चिट चोर्न नदिँदा कुटिए रत्नराज्यका प्राध्यापक, कारबाही नभएसम्म नपढाउने निर्णय

काठमाडौं । चिट चोर्न नदिएको भन्दै एक विद्यार्थीले शिक्षकमाथि कुटपिट गरेपछि रत्न राज्य लक्ष्मी क्याम्पस (आरआर) का प्राध्यापकहरु आन्दोलित भएका छन् ।

मंगलबार बिहान आन्तरिक प्ररीक्षाका क्रममा चिट चोर्न नदिएको भन्दै एमालेनिकट अनेराश्ववियुका कार्यकर्ता कुवेर जेठाराले प्राध्यापक प्रकाश पुडासैनीमाथि कुटपिट गरेका थिए ।

कुटपिटका कारण पुडासैनीको टाउकोमा सात टाँका लगाउनुपरेको बताइएको छ । प्राध्यापकमाथि कुटपिट गर्नेलाई कारबाही नगरेसम्म अध्यापन गर्न नसक्ने रत्न राज्य लक्ष्मी क्याम्पस (आरआर) का प्रध्यापकहरुले बताएका छन् ।

आक्रमणबाट प्रध्यापकको टाउकोमा चोट लागेको छ। उक्त कुटपिटको निन्दा गर्दै प्राध्यापकहरुले गल्ती अनुसारको कारबाही गर्न माग गरेका छन् । आरआर प्राध्यापक संघले विज्ञप्ति जारी गर्दै पीडकमाथि कारबाही गरी अध्यापन गराउने वातावरण बनाउन माग गरेको छ।