खोटाङमा सामाजिक दुरी कायम गर्दै जोरबिजोर रोल नम्बरका आधारमा पठनपाठन शुरु

खोटाङ । दिप्रुङ चुइचुम्मा गाउँपालिकाले गाउँपालिका क्षेत्रका विद्यालयहरूमा पठनपाठन शुरू गराएको छ। गाउँपालिकाभित्रका ४८ विद्यालयमा सामाजिक दूरी कायम गर्दै स्वास्थ्य सुरक्षा तथा सतर्कता अनपाएर विद्यालयको अनुकूलतामा विद्यार्थीको रोल नम्बरमा जोर बिजोर प्रणाली अपनाएर सिकाइ सहजीकरण शुरु गरिएको हो।

यसबाहेक गाउँपालिकाले जारी गरेको ‘गाउँटोल बस्ती सिकाइ सहजीकरण अभियान कार्यविधि’ अनुसार गाउँटोल बस्तीमा सिकाइ केन्द्र व्यवस्थापन गरी पठनपाठन गर्न सकिने व्यवस्था छ ।

लामो समयसम्म विद्यालय बन्द हुँदा शैक्षिक क्यालेण्डर प्रभावित हुने अवस्था आएपछि गाउँपालिकाले गत ७ साउनदेखि ३ भदौसम्म गाउँटोलमै शिक्षक पठाएर पठनपाठन गराएको थियो ।

विद्यालयले आफ्नो अनुकूलमा बिहान, दिउँसो वा बेलुका तालिका बनाएर पठनपाठनमा सहजीकरण गर्ने व्यवस्था मिलाइएको छ।

विद्यालयमा हुने भीडलाई नियन्त्रण गर्न जोरबिजोर रोल नम्बरका आधारमा विद्यार्थीलाई सिकाइ केन्द्रमा आउने व्यवस्था मिलाइएको गाउँपालिकाका शिक्षा शाखा संयोजक मणिकुमार गिरीले बताए।

“भीडभाडलाई कम गर्न विद्यार्थीलाई कक्षामा भौतिक दूरी कायम गरेर राख्ने व्यवस्था मिलाइएको छ”, उनले भने, “विद्यालयमा आएका विद्यार्थीलाई एक बेञ्चमा एक जना वा बढीमा दुईजनालाई मात्र राख्ने व्यवस्था गरेर पठनपाठन शुरु गरिएको छ ।” सात वडा रहेको उक्त गाउँपालिकाको ४८ विद्यालयमा पाँच हजार ५१२ जना विद्यार्थी हाल अध्ययनरत छन्।