शिक्षामन्त्री पोखरेलले भने, जोखिम कायमै रहेकाले तत्काल विद्यालय नखोल्नुस्

Girirajmani pokharel

काठमाडौं । दशेका विभिन्न स्थानहरुका धमाधम विद्यालयहरु खुल्न थालेका बेला शिक्षा, विज्ञान तथा प्रविधिमन्त्री गिरिराजमणि पोखरेलले कोभिड–१९ को जोखिम कायमै रहेकाले तत्काल विद्यालयहरु नखोल्न आग्रह गरेका छन् ।

मन्त्री पोखरेलले केही समय विद्यालय खोल्नभन्दा वैकल्पिक सिकाइ प्रणालीलाई प्राथमिकता दिन आग्रह गरेका छन् । शिक्षालयमा सङ्क्रमण देखिएमा त्यसलाई नियन्त्रण गर्न कठिन हुने भएकाले हाललाई सूचना, सञ्चार र प्रविधिको प्रयोगमा आधारित वैकल्पिक प्रणालीमा जोड दिन उनले आग्रह गरे ।

राजधानमीसहित देशभर कोरोना संक्रमण बढिरहेका कारण तत्काल विद्यालय खोल्दा झन संक्रमण बढ्ने भएकाले विद्यालय खोल्न उपयुक्त नभएको उनको तर्क छ । उनले विद्यालय खोल्नुभन्दा पनि संक्रमण न्युनिकरण गर्दै विद्यार्थीलाई वैकल्पिक शिक्षातर्फ आकर्षित गरिनुपर्ने उनको जोड थियो ।

शिक्षा पत्रकार समाजले आज आयोजना गरेको ‘वैकल्पिक सिकाइको कार्यान्वयनमा सञ्चारमाध्यमको भूमिका’ विषयक भर्चुअल छलफलमा मन्त्री पोखरेलले न्यूनतम सिकाइको सुनिश्चितका लागि सरकारले आकस्मिक कार्ययोजना ल्याई यही असोजको पहिलो साताबाट कार्यान्वयन शुरु गरिसकेकाले सबै स्थानीय तहका सम्बन्धित विद्यालयमा शिक्षकहरुलाई अनिवार्य पुग्न निर्देशन गरिएको बताए ।

उनले शिक्षक, अभिभावक र विद्यार्थीको सम्पर्क स्थापितका लागि सामुदायिक विद्यालयमा निःशुल्क र निजी विद्यालयमा सहुलियत रुपमा क्लोज युनिट ग्रुप (सियुजी) मा आबद्ध गराई सञ्चार सहजता बढाइएको बताए । कतिपय जिल्लाका विद्यालयले अहिले सामाजिक दूरी कायम गरी प्रत्यक्ष सिकाइ पनि आरम्भ गरिसकेका छन् ।

 

प्रतिकृया दिनुहोस