दुई जिल्ला जोड्ने सडक विस्तार अलपत्र

काठमाण्डौं । सडक विस्तारका क्रममा टेवा पर्खाल भत्किएर तरकारी तथा अन्नबाली नष्ट भएको भन्दै एक वर्षदेखि स्थानीयवासीले अवरोध गरेपछि भक्तपुर र काठमाडौँ जोड्ने सडक निर्माण अलपत्र बनेको छ । 

भक्तपुरको बोडेबाट काठमाडौँको मूलपानी जोड्ने बोडे मूलपानी सडक विस्तारका क्रममा नीलबाराही चेकपोस्ट नजिकै निर्माण भइरहेको टेवा पर्खाल गतवर्ष भत्किएको थियो ।

बाली क्षति भएका कृषकलाई क्षतिपूर्ति स्वरूप ६ लाख दिए पनि कृषकले ३७ लाख माग गरेर सडक निर्माण कार्यमा अवरोध गरेपछि समस्या आएको डिभिजन सडक कार्यालय भक्तपुरका प्रमुख इञ्जिनियर गुरुप्रसाद अधिकारीले जानकारी दिए ।

आर्थिक वर्ष २०७२:७३ मा थिमिको बाहाखाबजार, पुरानो बाटो हुलाक मार्ग र नगरपालिका भवन हुँदै मिलरोड, बोडै हँदै मनोहरासम्म जोड्ने २.८ किलोमिटर सडक निर्माण सम्पन्न गर्न समस्या भएको छ ।

सात मिटर फराकिलो कालोपत्रे एवं फुटपाथसहित निर्माण हुने उक्त सडकको मापदण्डभित्र परेका घरटहरा, बिजुली, टेलिफोनको पोल नहटाउँदासमेत सडक विस्तारमा समस्या आएको अधिकारीले बताए ।

उक्त सडकमा मापदण्डभित्र ३८ घरटहरा, ३५ बिजुलीको पोल, ३२ टेलिफोनको पोल, दुईवटा मन्दिर र ढुंगेधारा, दुईवटा कम्पाउन्ड पर्खाल परे पनि त्यसलाई नहटाइदिँदा सडक विस्तारमा समस्या परेको छ ।