गायक हरिप्रसाद रिमालको निधन

काठमाडौं । रेडियो नेपालका पहिलो गायक एवम् नाट्यकर्मी हरिप्रसाद रिमालको निधन भएको छ ।

काठमाडौंको नयाँ बानेश्वरमा बसोबास गर्दै आएका रिमालको शुक्रबार बिहान १ बजेर सात मिनेटमा ९३ वर्षको उमेरमा भएको आफन्तजनले बताएका छन् ।

रिमाल विसं १९८२ साल असोज २ गते जन्मिएको पार्थिव शरीर अन्तिम श्रद्धाञ्जलीका लागि शुक्रबार बिहान १० बजेसम्म उनकै निवासमा राखिने छ । त्यसपछि पशुपति आर्यघाट लगेर अन्त्यष्टि गरिने आफन्तले बताएका छन् ।

रिमालको ‘फगत एक नजरमा कसैले लियो मन’ लगायत गीत सदाबहार छन् । उनी नेपाली नाटक र चलचित्र जगतका प्रख्यात अभिनेता तथा निर्देशक थिए । उने ‘आमा’, ‘मनको बाँध’, ‘के घर के डेरा’, ‘सन्तान’, ‘मुकुन्द इन्दिरा’ जस्ता ऐतिहासिक नाटकमा अभिनय गरेका थिए ।