ओलीलाई कोइरालाको प्रश्न : कालिदासले कुनै डिग्री लिएका थिए र ?

काठमाडौं । क्यानाडा जान लागेका नेपाल संस्कृत विश्वविद्यालयका उपकुलपति प्रा. डा. कुलप्रसाद कोइराला आफु विमानस्थलबाट नियन्त्रणमा लिइएको घटनालाई सामान्य रुपमा नलिएको बताएका छन् ।

डा. कोइरालाले आफुलाई प्रधानमन्त्री केपी शर्मा ओलीको ठाडो निर्देशनमा अपराधीलाईजस्तो छापामार शैलीमा विमानस्थलबाट नियन्त्रणमा लिइएको आरोप लगाएका छन् ।

‘म त एक प्रतिनिधि पात्र मात्रै हुँ, मलाई अपराधीजस्तो गरेर पक्राउ गर्नु भनेको नेपाली र प्राज्ञिक क्षेत्रको अपमान हो’ आइतबार गरिएको पत्रकार सम्मेलनमा उनले भने, ‘मैले अपमानका प्याला सहज तरिकाले पिउन सक्छु । तर प्रजातन्त्र, लोकतन्त्र, गणतन्त्रको लागि लडेको सिँगो नेपाली समाजलाई यस्ता गतिविधि पाच्य हुँदैनन् ।’

यो घट्नाले सो सम्मेलनमा भाग लिन आउने १११ राष्ट्रहरुमा समेत नेपालको सरकारको नकरात्मक सन्देश प्रवाह भएको उनको भनाई छ ।
‘म क्यानडामा पिकनिकको लागि जान खोजेको थिईँन्’ उनले भने, ‘हाम्रो सभ्यता, संस्कृत र संस्कृतिको प्रर्वद्धन तथा विकासको विषयमा अन्तर्राष्ट्रिय मञ्चमा भाग लिनको लागि जान लागेको थिएँ ।’

आफुले अघिल्लोपटक प्रचण्ड ज्यु प्रधानमन्त्री हुँदा चीन गएकै विधि र प्रकिया अपनाएर विदाको निवेदन दिएको जिकिर गरे । उनले आफ्नो निवेदन शिक्षा मन्त्रालयमा ७३३ नम्बरमा दर्ता भए पनि त्यो रोकिएको बताए । उनले प्रश्न गरे, ‘मेरो विदाको निवेदनको फाइल किन लुकाइयो ?’

उनले सो घट्नालाई आफूले सामान्य रुपमा नलिएको बताउँदै यो अन्तर्राष्ट्रिय फोरममा समेत यो विषयले नेपालको बेईज्जती भएको दुःखेसो पोखे । हवल्दारी पाराले विश्व विद्यालय नचल्ने दाबी गर्दै उनले विश्वविद्यालयलाई राजनीतिक हस्तक्षेपमुक्त बनाउन प्रधानमन्त्री तथा विश्वविद्यालयका कुलपति केपी शर्मा ओलीलाई आग्रह गरे ।

‘हवल्दारी पाराले प्राज्ञिक क्षेत्रलाई तहसनहस पार्न खोज्नु मुर्खता हो’ उनले प्रधानमन्त्री ओलीलाई प्रश्न गरे, ‘के कालिदासले कुनै डिग्री लिएका थिए र ? सबै वैज्ञानिकहरुले विश्वविद्यालयको आँगन टेकेका थिए र ? थिएनन् ।’ उनले आफुहरुले त्यति धेरै कुरा नबुझे पनि ‘तर तपाईहरुभन्दा केही जान्दछौं’ भन्दै ओलीलाइृ ठूलो चुनोती दिए ।

‘मलाई यो किसिमको अपहरण किन गरियो ?’ उनले भने, ‘म विनम्र अनुरोध गर्न चाहन्छु, ओलीज्यू हामीलेपनि लोकतन्त्र र गणतन्त्रको लागि भूमिका खेलेका छौं ।’ उनले ओलीको कदमलाई अधिकानायवादको पूर्व संकेत भएको दावी गरे । उनले भने, ‘नेपालको लागि अधिनायकवाद कल्पनाभन्दा बाहिरको कुरा हो, सरकारका रवैयाहरुले राम्रो संकेत दिइरहेको छैन ।’