सुर्खेतका द्धन्दपीडितका लागि राहत वितरण गरिने

सुर्खेत, ।शान्ति तथा पुनःनिर्माण मन्त्रालयले द्वन्द्वपीडितलाई पुनःस्थापना गर्ने लक्ष्यअनुसार दोस्रोचरणका लागि राहत वितरण गर्न लागेको हो । सुर्खेतका द्धन्दपीडितका लागि २० करोड ४० लाख ६४ हजार राहत वितरण गरिने भएको छ ।

दशवर्षे जनयुद्धमा मृत्यु भएका, बेपत्ता पारिएका, अपहरण गरिएका, विस्थापित परिवारका हकदारका लागि राहत रकम वितरण गरिने स्थानीय शान्ति समितिले जनाएको छ ।

मृत्यु र बेपत्ता पारिएका पीडितमध्ये लगत सङ्कलन समितिको छनोटमा परेका ३ सय ३६ परिवारका लागि १४ करोड ८३ लाख ५० हजार राहत वितरण गरिनेछ । सरकारले मृत्यु र बेपत्ता परिवारका लागि १० लाख राहत पु¥याउने लक्ष्यअनुसार पहिलोचरणमा २ सय ८८ जनालाई राहत वितरण गरिएको थियो ।

यसैगरी विस्थापित परिवारका लागि ४ करोड १० लाख वितरण गरिने छ । उक्त रकम ५ सय ५ विस्थापित परिवारले पाउने छन् । अपहरण पारिएका परिवारका लागि ३ लाख आएकोमा यस पटक १२ जनालाई वितरण गरिने भएको छ ।

स्थानीय शान्ति समितिका संयोजक मोहन थापाले अपहरणमा परेका परिवारका हकमा २५ हजार नबढ्ने गरी राहत वितरण गर्न मन्त्रालयबाट निर्देशन आएको जानकारी दिए । शान्ति समितिको तथ्याङ्कअनुसार जिल्लामा ८ सय ५२ जना अपहरणमा परेका द्वन्द्वपीडित छन् ।

द्वन्द्वका समयमा घाइते र अपाङ्ग भएका व्यक्तिका लागि जीवन निर्वाहमा मद्दत पुगोस् भन्ने उद्देश्यले ५१ प्रतिशत अपाङ्ग र घाइते परिवारलाई मासिक रुपमा ६ हजार २ सय वितरण गरिँदै आएको संयोजक थापाले बताए ।

जसका लागि १३ लाख ४९ हजार यस पटक वितरण गरिनेछ । उक्त रकम १६ जनाका लागि वितरण गरिँदै आएको उनले बताए । संयोजक थापाकाअनुसार द्वन्द्वपीडितका लागि आएको राहत रकम असार मसान्तमा वितरण नभएमा फ्रिज हुनेछ । लगत समितिको छनोटमा परेका एक सय २३ जना द्वन्द्वपीडितले पहिलोचरणको राहत पाएका थिए ।