चलचित्र विकास बोर्ड भन्छ, हलमा फुटबल देखाउन पाइन्नँ

काठमाडौं । चलचित्र विकास बोर्डले काठमाडौं लगायतका देशका विभिन्न चलचित्र हलहरुमा विश्वकप फुटबलका खेल प्रदर्शन गर्न रोक लगाएको छ ।

चलचित्र हललाई चलचित्रमात्र प्रदर्शन गर्ने अधिकार रहेको भन्दै बोर्डले विश्कप फुटबलको खेल प्रदर्शन गरे कारबाही गर्ने चेतावनी दिएको छ । यसअघि कतिपय फिल्म हलमा विश्वकप फुटबलका खेलहरु प्रदर्शन गर्न लागिएको भन्ने खबर सार्वजनिक भएको थियो ।

बोर्डले नियमको पालना नगरे कानुनबमोजिम कारबाही गर्ने चेतावनी दिँदै पत्रको बोधार्थ सबै जिल्ला प्रशासन कार्यालय र नेपाल चलचित्र सङ्घलाई समेत दिएको छ ।

शुक्रबार बोर्डका अध्यक्ष भुवन केसीद्वारा जारी विज्ञप्तिमा भनिएको छ, ‘उपरोक्त सम्बन्धमा ‘चलचित्र प्रदर्शन गर्न दिइने इजाजतपत्रको अनुसूची ७ मा व्यवस्था भएको चलचित्र प्रदर्शन गर्न दिइने इजाजत पत्रको खण्ड ७ मा इजाजतपत्रवालाले पालना गर्नुपर्ने शर्त बमोजिम’ मात्र चलचित्र घरमा चलचित्र प्रदर्शन गर्नुहुन सूचित गरिन्छ ।’