‘ए’ डिभिजन लिग : आज सातदोबाटो र हिमालयन भिड्दै   

काठमाडौं । सहिद स्मारक ‘ए’ डिभिजन लिगमा सोमबार सातदोबाटो र हिमालयन शेर्पाबीच प्रतिस्पर्धा हुँदैछ । यो प्रतियोगिताको सातौं चरणका अन्तिम खेल हुनेछ ।

खेल दशरथ रंगशालामा हुनेछ । माथिल्लो डिभिजनको लिगमा नवप्रवेशी रहेको सातदोबाटोको ६ खेलबाट ८ अंक छ र सातौं स्थानमा रहेको छ ।

हिमालयनको पनि ६ खेलबाट ८ अंक नै छ र आठौं स्थानमा रहेको छ । दुवै टिम प्रतियोगितामा तेस्रो जितको खोजीमा हुनेछ ।

प्रतियोगितामा उत्कृष्ट सुरुआत लिएका सातदोबाटोले पछिल्ला तीन खेलमा एकै अंक मात्र बटुलेको छ । उसमाथि फेरि लयमा फर्कने दबाब हुनेछ । हिमालयन भने पछिल्ला दुई खेल लगातार जितेर उत्साहित रहेको छ ।