५ परिवारका लागि अपांगमैत्री बासस्थान निर्माण गर्ने घोषणा

काठमाडौं । खोटाङका ५ जना अपांग परिवारका लागि अपांगमैत्री बासस्थान बनाइने भएको छ । मानवताका लागि शान्ति र संस्कृति नाम संस्थाले एकै परिवारका ५ जना अपांगगता भएकाहरुका लागि बासस्थान बनाइदिने भएको हो ।

संस्थाले वासस्थान निर्माणका लागि स्थान भने छनोट गरिसकेको छैन । परिवारका अपांग सदस्यलाई पायक पर्ने स्थानमा भवन निर्माण गर्ने योजना रहेको संस्थाका अध्यक्ष प्रितम खड्काले बताए ।

राजधानीमा आयोजित पत्रकार गर्दै संस्थाका अध्यक्ष खड्काले आफूले एक वर्ष पहिले सो परिवारलाई भेटेपछि अपांगमैत्री भवन निर्माणका लागि पहल गरेको बताए । उनले अपांगता भएकाहरुलाई सुरक्षित वावासको आवश्यकता ठानेर संस्थाले निःस्वार्थ भावनाले बासस्थान बनाउन लागेको बताए ।

सो पत्रकार सम्मेलनमा भक्तबहादुर विष्टले आफूहरुसँग केही गरेर खाने सिप भए पनि वासस्थानको अभावका कारण समस्या भएको बताए । संस्थाका सल्लाहकार एवं राजनीतिक विश्लेषक डा. सुरेन्द्र केसीले देशभर १८ दशमलव १३ प्रतिशत अपांग भए पनि उनीहरुको विषयमा सरकारले कुनै पहल कदमी नचालेको बताए । ‘देशमा अपांगको संख्या धेरै छ । त्यसैले यस विषयमा राज्य नै गम्भीर हुनुपर्छ’ उनले भने, ‘यसरी एक–दुई स्थानमा एक–दुई घरपरिवारका लागि बासस्थान निर्माण गरेर अपांगको समस्या निर्मूल हुँदैन ।’