माओवादीलाई गाली गर्नेहरुले पनि अब बुझिसके : डिबी लामा

काठमाडौं । नेकपा माओवादी केन्द्रका नेता धर्मेन्द्र लामा (डिबी) ले माओवादीलाई गलत ढंगले व्याख्या गर्ने दिन सकिएको बताए ।

उनले संघर्षका क्रममा माओवादीबाट भएका केही गल्तीलाई हेरेर सधैंभरि नराम्रो देख्ने परम्परा अन्त्य हुनुपर्नेमा जोड दिए । उनले माओवादीले लिएको सही बाटोले नै देशमा आमूल परिवर्तन भएको हुँदा त्योभन्दा अर्को गन्तव्य त्यतिबेला र यतिबेला पनि नभएको बताए ।

लामाले आफू माओवादीको राजनीतिमा लागेपनि सबै पार्टीको साझा मान्छे भएको बताए । ‘राजनीति भनेको समाजसेवा हो, यसलाई कसैले पनि दुरुपयोग गर्नु हुँदैन ’ उनले भने ‘ राजनीतिले देशलाई दिन सक्नुपर्छ, आम्दानीको बाटो राजनीति बनाइयो भने व्यापारीजस्तो बन्न जान्छन् पार्टीहरु, यो खतरा नआओस् भन्ने हो ।’ उनले राजनीतिसँगै समाजसेवामा पनि विशेष समय छुट्याएका छन् ।

समाजलाई चित्त बुझाउन सके राजनीतिमा आउने समस्याहरु आफंै हट्दै जान्छन् भन्ने उनी नेकपा माओवादी केन्द्रको तर्फबाट मकवानपुर क्षेत्र नम्बर एकको ‘ ख’ प्रदेशमा प्रतक्ष्यतर्फमा उम्मेदवार सिफारिसमा परेका छन् । पार्टीले विश्वास गरेर उम्मेदवार बनाएकामा उनी खुशीमात्र छैनन्, सँगसँगै जिम्मेवारी पनि थपिएको महसुुस गरेका छन् ।

‘ वास्तवमा म सामाजिक कार्यकर्ता हुँ, समाज बिकासमा म सधैं चिन्तित छु ’ उनले भने ‘ म एउटा यूवा नेता भएकाले भविष्य सोचेको छु त्यसैले सानातिना प्रभावमा परेर अहिले नै समाप्त हुनु छैन ।’ उनले एमाले, माओवादी केन्द्र र नयाँ शक्तिबीचको गठबन्धन आवश्यकताका आधारमा बनेको बताउँछन् ।

‘माओवादीले जनयुद्ध गरेर देश बिगारेको आरोप लगाउनेहरु आज सही बाटोमा आएका छन्’ उनले भने ‘ अबको निर्वाचनबाट देशमा कम्युनिष्ठ पार्टी बलियो हुन्छ र जनताले न्याय पाउँछन् ।

’ पार्टीले आपसमा तालमेल गर्ने निर्णय गरेपछि कसैलाई चित्त बुझ्छ कि बुझ्दैन भन्ने प्रश्नतिर जानु अव्यवहारिक भएको उनको टिप्पणी छ । एकता र तालमेल कसैको स्वार्थको लागिमात्र हुन्छ कि भन्ने प्रश्नमा भने ‘ राजनीतिमा शंका गर्ने ठाउँहरु हुँदैनन् भन्ने होइन देश ठूलो कुरा हो अन्य सानातिना स्वार्थ गौण राख्नुपर्छ, यो नै राजनीतिको मुलमन्त्र हो ।’