विमानस्थलको ठेक्का तोड्ने सुरमा प्राधिकरण

काठमाडौं। भैरहवा विमानस्थलको काम सन्तोषजनक रुपमा अघि नबढेपछि नागरिक उड्डयन प्राधिकरण चिनियाँ ठेकेदार नर्थ वेष्ट सिभिल एभिएसनसँग ठेक्का तोड्ने मुडमा पुगेको छ ।

सन् २०१७ को अन्त्यसम्म निर्माण सम्पन्न गर्ने गरी विमानस्थलको काम सुरु भएको थियो । पछिल्लो केही समयदेखि चिनियाँ कम्पनी आफैले गरिरहेको छ । तर पनि सन्तोषजनक काम नभएको अधिकारीहरु बताउँछन् ।

समयमै निर्माण हुन नसक्ने देखेपछि सरकारले सन् २०१८ मा सक्ने नयाँ लक्ष्य निर्धारण गरेको छ । तर, कामको गति हेर्दा सन् २०१८ मा पनि सम्पन्न हुने देखिँदैन । हिलेसम्म भैरहवा विमानस्थलको जम्मा ३० प्रतिशत मात्रै काम भएको छ ।

चिनियाँ कम्पनी र सब कन्ट्रयाक्टर नेपाल इन्फ्रा बिचको विवादले नै लामो समय काम अघि बढ्न सकेन । चिनियाँ कम्पनीले नेपाल इन्फ्रासँगको सम्बन्ध तोडेको थियो । चिनियाँ कम्पनी र नेपाल इन्फ्राबिच रकम लेनदेनको विषयमा विवाद उत्पन्न भएको थियो ।

ठेक्का नै धरापमा पर्ने देखेपछि यसले नेपाल इन्फ्रासँगको ठेक्का तोडेर पछिल्लो पाँच महिनादेखि एक्लै काम गर्न थालेको हो । चिनियाँ कम्पनीले भौतिक प्रगति मासिक ६ प्रतिशतले गर्नुपर्ने हो तर, अहिले यसले ०।५ प्रतिशतका दरले मात्र काम गरिररहेको छ ।

गौतमबुद्ध विमानस्थललाई स्तरोन्नती गरी अन्तर्राष्ट्रिय स्तरको बनाउन चिनियाँ कम्पनीलाई ६ अर्ब २२ करोड ५१ लाख रुपैयाँमा जिम्मा दिइएको थियो । यो एसियाली विकास बैंक एडीबी को ऋण सहयोगमा सुरु भएको आयोजना हो ।

चिनियाँ कम्पनीसँग ठेक्का तोडे पनि एडीबीको लगानी निरन्तर हुने दाबी नागरिक उड्डयन प्राधिकरणको छ । ‘ठेक्का तोडे पनि लगानी निरन्तर रहन्छ ।’एसियाली बिकास बैंक एडीबी भने यसमा ठेक्का तोड्न कुनै सुझाव नदिएको बताउँछ ।

एडीबीको बाह्य सम्वन्ध अधिकृत बिनिता खड्काले भनिन्, ‘नोटिस् टु करेक्टका लागि हामीले कुनै सुझाव दिएका छैनौं, साथै ठेक्का तोड्ने बिषयमा पनि अहिले हामीले कुनै सुझाव दिएका छैनौं ।’