उपत्यकाबाट २९ मेट्रिक टन फोहर व्यवस्थापन

काठमाडौँ,। उपत्यकाका नदी र चक्रपथ सफाइ गरी २९ मेट्रिक टन फोहर व्यवस्थापन गरिएको छ । वाग्मती सफाइ महाभियानको २२० औँ हप्तामा आज टेकु दोभानस्थित नदी किनारमा सफाइ गरी ८ मेट्रिक टन फोहर व्यवस्थापन गरियो ।

सफाइमा अधिकार सम्पन्न वाग्मती सभ्यता एकीकृत विकास समिति, काठमाडौँ महानगरपालिका, काठमाडौँ उपत्यका खानेपानी लिमिटेड, नेपाली सेना, नेपाल प्रहरी, मुक्तिनाथ विकास बैंक, पहिलो पाइला, न्यानो स्पर्श, नेपाल नदी संरक्षण संस्था, जीवन विज्ञान, हलेसी डेकोर, युरेसिया रेयुकाइ, गायत्री परिवार, नेपाल विज्ञापन संघ, साया समूह, सेवा समाज, ब्लु क्रस अस्पताल एम्बुलेन्सलगायत २८ संस्थाका प्रतिनिधिको सहभागिता थियो ।

सफाइमा नायिका एवं वाग्मती सभ्यतादूत मनिषा कोइराला, पूर्व सचिवद्वय किशोर थापा र डा कृष्णचन्द्र पौडेल, अधिकार सम्पन्न वाग्मतीका आयोजना प्रमुख ज्योतिकुमार श्रेष्ठ, गायत्री परिवारका डा राजु अधिकारी, जीवन विज्ञानका एलपी भानु शर्मा, वाग्मती अभियन्ता डा.लक्ष्मी पौड्याल, अर्जुन धरेल, गोकुल थापा, टंकराज आचार्य, किशोरसिंह शाही, नारायणकुमार श्रेष्ठ, चक्रबहादुर चन्द, मेघ आलेलगायत ५ सय जनाको सक्रियता थियो ।

गुह्येश्वरीमाथिको वाग्मतीमा राम्रो जोरपाटी हाम्रो जोरपाटी र पुडासैनीमैत्री समाजले गरेको १८१ औँ हप्ताको सफाइमा २ मेट्रिक टन फोहर व्यवस्थापन गरियो । सफाइमा १सय भन्दा बढीको उपस्थिति थियो ।

रुद्रमती सफाइको १७९ औँ हप्तामा आज रातोपुलदेखि ज्ञानेश्वर हुँदै आनन्द भैरव मन्दिरसम्म सफाइसहित घरदैलो गरियो । घरदैलोसहितको सफाइबाट एक मेट्रिक टन फोहर व्यवस्थापन गरियो ।

काठमाडौँ महानगरपालिका–३० का वडा अध्यक्ष दलबहादुर कार्कीको नेतृत्वमा भएको अभियानका क्रममा ज्ञानेश्वर मार्गमा सडक विस्तार कार्यक्रमलाई अभियानले सघाएको रुद्रमती सरोकार समाजका उपाध्यक्ष रोहित गिरीले जानकारी दिए ।

विष्णुमती सफाइको १५१ औँ हप्तामा शनिबार गोंगबु नयाँ बसपार्क क्षेत्रको नदी किनारमा सफाइ गरी ५ मेट्रिक टन फोहर व्यवस्थापन गरियो । सफाइमा २ सय भन्दा बढीको सहभागिता थियो ।

तिलगंगा महिला समूहले तिलगंगा क्षेत्रको वाग्मतीमा गरेको १२७ हप्ताको सफाइमा एक मेट्रिक टन फोहर व्यवस्थापन गरियो । सकारात्मक मातृशक्ति आवाजले आलोकनगर मीनभवन क्षेत्रमा गरेको १६ औँ हप्ताको सफाइमा एक मेट्रिक टन फोहर व्यवस्थापन गरियो । सफाइसँगै आलोकनगरको गाँजा फँडानी गरिएको थियो । सफाइमा ६५ जनाको सहभागिता थियो ।

चक्रपथ सफाइको १६ औँ हप्तामा शनिबार गोंगबुको बिजी मल अघि सफाइ गरी ११ मेट्रिक टन फोहर व्यवस्थापन गरियो । सफाइमा ३ सय जनाभन्दा बढी अभियानकर्मीको सक्रियता थियो ।