पालुङटारकी उपमेयर बसेल भन्छिन्, मेरो समुदायका लागि केही गरेर देखाउँछु

माओवादी सशस्त्र विद्रोहमा सहभागी गोरखा पालुङटार नगरपालिका–१ खोप्लाङ बेलबासमा जन्मिएकी २९ वर्षीया पम्फा बसेल पालुङटार नगरपालिकाको उपमेयर बनेकी छन् । उनले उनले ४ हजार ४ सय ९४ मत ल्याउँदै स्थानीय तहको पहिलो चरणको निर्वाचनमा पालुङटार नगरपालिकाको उपमेयर पदमा विजयी भएकी हुन् । प्रस्तुत छ, पम्फा बसेलसँग गरिएको कुराकानी ।

पालुङटार नगरपालिकाको उपमेयरमा विजयी हुनुभएको छ । कस्तो लागिरहेको छ ?
जनताले मत दिएर मलाई उपमेयर बनाउनुभएको छ । म खुसी छु । साथसाथै मेरो काँधमा नयाँ जिम्मेवारी पनि थपिएको छ । मैले पहिले जसरी जनताको काम गर्थे, त्योभन्दा पनि बढी जिम्मेवार भएर काम गर्नुपर्ने अवस्था आएको छ । म मलाई जुनप्रकारले जनताले विश्वास गरेका छन्, त्यसलाई पूरा गरेर देखाउने छ । जित्दा खुसी लागेको छ । तर चुनौतीपूर्ण अवसरका रूपमा लिएको छु ।

उपमेयर बन्नुभएको छ । तपाईका एजेण्डाहरु केके छन् ?
पहिलो त यो पहिलोपटक बनको नगरपालिकाको हो । तर, पनि हामीले यो नगरपालिकाकालाई विकास गरेर स्मार्ट सिटी बनाउने छौं । त्यसका लागि सबैभन्दा पूर्वाधारको बिकास जरुरी छ । त्यसका लागि पहिले सडक निर्माण जरुरी छ । पर्यटनको विकासका लागि पदमार्ग निर्माण गर्नुपर्ने भएको छ । त्यसका अलावा नगरपालिकाको विकासका लागि नीतिगत आवश्यकता पूरा गर्नुपर्छ । त्यसका लागि आवश्यक पहल गर्नेछौं । वर्गीय विभाजनका आधारमा यहाको नगरपालिकाको विकासका लागि रोजगारमुलक कार्यक्रम सञ्चालन गर्ने । त्यसका लागि गोष्ठी गरेर योजना बनाउने छौं ।

तपाईले पालुङटारका दलित समुदायका अधिकार स्थापित गर्न केके पहल गर्नुहुन्छ त ?
म एउटा दलित मात्र नभएर महिला पनि हुँ । त्यही भएर पनि मैले दलित समुदायको विकासका लागि केही न केही नयाँ र विचारणीय काम गर्नैपर्छ सबैभन्दा पहिले पालुङटार नगरपालिकालाई भेदभावरहित बनाउनुपर्छ । सामाजिक चेतनामुलक कार्यक्रम गर्न जरुरी छ । पहिलो कुरा शिक्षा हो । हामीले सबैभन्दा पहिलो यहाँका विद्यालयमा कक्षा १ देखि नै जातीय भेदभावविरुद्धका विषय समेट्ने गरी छलफल चलाइरहेका छौं । पहिलो चरणमा छलफल चलिसकेको छ र यो विषयमा सबै सकारात्मक भएकाले पनि यो नगरपालिकालाई भेदभावरहित समाज बनाउन सक्छौं ।

त्यसका लागि बस्तीको छनौट गर्नुभएको छ कि छैन ?
स्वभाविक रुपमा हामीले त्यसका लागि एउटा पीडित बस्ती छान्नुपर्ने हुन्छ । पहिलो कुरा त हामीले अशिक्षत बस्ती, जहाँ चेतनास्तर कम छ, त्यहीबाटा यो कामको थालनी गर्छाै । त्यसका लागि गृह कार्य मात्रै भइरहेको छ । अब हुने नगर परिषदबाट बजेट पनि छुट्टयाइन्छ ।

पालुङटार नगरपालिकाभित्र रहेका दलित समुदायका समस्या कस्ता छन् ?
पक्कै पनि नेपालका अरु भागमा जस्तै यहाँ पनि छुवाछूत प्रथा कायम छ । केही हदसम्म शिक्षित बस्तीमा कम छुवाछूत छ भने अशिक्षा भएका ठाउँमा छुवाछूत बढी छ । यहाँका कति पनि रोजगारमुलक छन् भने बेरोजगार पनि छन् । कतिपय चाँही आफैं रोजगार गरेर खान पुग्ने अवस्थाका छन् भने कतिपय चाँही जतिगरे पनि खान नपुग्ने दलितहरु प्नि छन् । खासगरी हामीले यहाँ सुकुम्बासी दलितहरुलाई आधार मानेर अघि बढेका छौं ।

यहाँका दलितले भोग्दै आएका समस्यालाई समाधान गर्न केके गर्दै हुुनुहुन्छ त ?
मैले यहाँको हकमा भन्नुपर्दा दुईवटा कुराको हल गर्नुपर्ने हुन्छ । म एउटा महिला मात्रै नभएर यो राज्यले वर्षाैदेखि पीडामा पारेको वर्गको मान्छे हुँ । त्यही भएर पनि मैले मेरो समुदायको हक अधिकारका लागि केही न केही गर्नैपर्छ । किनकी बल्लबल्ल अधिकार कार्यान्वयनको तहमा पुगेको बेला हाम्रा समुदायबाट पनि ठूलो आस भइरहेको हुन्छ । म त्यसलाई पूरा गर्छु । त्यसका अलावा यो नगरको एउटा मात्र दलित बस्तीलाई नमुना बस्ती बनाउने प्रयासमा छौं । जुन बस्तीमा जातीय भेदभाव पनि नरहोस् र समाजलाई यसले नयाँ सन्देश पनि दिन सकोस् । जस्तो प्रकारको बस्ती छ, त्यसैलाई आधार मानेर विकास गरेर नयाँ बस्ती र नमुना बस्ती बनाउने योजना छ । अवस्य पनि त्यो पूरा हुन्छ ।