माईभ्यालीको उपाधी थ्रीस्टारलाई !

Mai valley

इलाम । चौथो अन्तर्राष्ट्रिय आमन्त्रण टुबोर्ग माइभ्याली गोल्डकपको उपाधि रुस्लान थ्री स्टार फुटबल क्लबले चुमेको छ । उपाधिका लागि प्रतिस्पर्धामा रहेको लक्ष्मी हुन्डाई मनाङ–मस्र्याङ्दी क्लबलाई १–० गोल अन्तरले पाखा लगाउँदै थ्री स्टार च्याम्पियन बनेको हो ।

निर्धारित समय दुवैतर्फबाट गोलरहित बराबरी भएपछि खेल १५ मिनेटको अतिरिक्त समयमा धकेलिएको थियो । थ्री स्टारका चर्चित स्ट्राइकर विमल घर्तीमगरको पासमा सुनील बलले विपक्षी मनाङको गोल पोस्टमा बललाई जाली चुमाए । विमलले उत्कृष्ट ड्रिबलिङसहित डि–बक्स छेउबाट दिएको छोटो पासलाई सुनीलले सहज सदुपयोग गरे ।

जितसँगै विजेता थ्री स्टारले नगद ६ लाख ६६ हजार र माइभ्याली गोल्डकपको उपाधि ‘मेयर्स कप’ हात पारेको छ । उपविजेता मनाङले नगद ४ लाख र उपविजेताको ट्रफीमा चित्त बुझाएको छ । यो जित नै थ्री स्टारलाई सिजनको पहिलो उपाधि विजेता बनाउनसमेत सफल भएको छ । गत सिजनमा पनि थ्री स्टारले मनाङमाथि ५ पटक विजय हासिल गरेको थियो । फाइनल खेलको म्यान अफ् दि म्याच मनाङका हेमन गुरुङ घोषित भए ।

उपविजेता मनाङका कप्तानसमेत रहेका राष्ट्रिय टिमका कप्तान विराज महर्जनले म्यान अफ् दि सिरिजको पुरस्कारस्वरूप स्कुटी हात पारे । बेस्ट गोलकिपर एलन नेउपाने, डिफेन्डर पिटर, मिडफिल्ड सुनील बल, फरवार्ड मार्टिन र प्रशिक्षक मेघराज केसी घोषित भए । उनीहरू सबै विजेता थ्री स्टार क्लबका खेलाडी हुन्।

सर्वाधिक गोलकर्तामा नवीन लामा, रोजिन सुब्बा, मनिष थापा र युवराज खड्का संयुक्त रूपमा घोषित भए। उनीहरूले समान २–२ गोल गरेका थिए। प्रतियोगिताका उदीयमान खेलाडी माइभ्यालीका दर्शन गुरुङ भए । पुरस्कृत खेलाडी र प्रशिक्षकले जनही १५ हजार र सर्वाधिक गोलकर्ताले संयुक्त रूपमा २५ हजार नगद पाए ।

वैशाख ६ मा सुरु प्रतियोगिताका प्रत्येक दिनका म्यान अफ् दि म्याचलाई नगद १० हजार र चाँदीको मेडल प्रदान गरिएको थियो। प्रतियोगितामा ए–डिभिजन क्लबसहित नेपाल, भारत र बंगलादेशका १२ टिम सहभागी थिए । प्रतियोगितामा ३ विभागीय टिम त्रिभुवन आर्मी, सशस्त्र प्रहरीको एपिएफ र नेपाल पुलिस क्लब, आयोजक माइभ्याली क्लब, पोखराको कास्की–११, संकटा, लक्ष्मी हुन्डाई मनाङ–मस्र्याङ्दी, रुस्लान थ्री स्टार, रमपम झापा–११, भारतको दुर्गापुर स्टिल र युनाइटेड सिक्किम तथा बंगलादेशको कावरान प्रगति संघले सहभागिता जनाए ।

माइभ्यालीको पहिलो संस्करणको उपाधि त्रिभुवन आर्मी क्लब र दोस्रो तथा तेस्रो संस्करणको उपाधि रमपम झापा–११ ले जितेका थिए।

प्रतिकृया दिनुहोस