मुलुकको समृद्धिका लागि वाम गठबन्धन : नायक

लहान । पूर्वमन्त्री तथा नेकपा माओवादी केन्द्रका पोलिटब्यूरो सदस्य अजयशंकर नायकले वाम गठबन्धन मुलुकको समृृद्धिका लागि उपयुक्त भएको बताएका छन् ।

सिरहा क्षेत्र नं ४ बाट प्रतिनिधिसभा सदस्यका उम्मेदवार बनेका नायकले वाम गठबन्धन व्यक्तिगत स्वार्थका लागि नभई जनताको जनजीविका, गरिबी, बेरोजगारी समस्या समाधान र मुलुकको समृद्धिका लागि भएको जिकिर गरे ।
नायकले जनजीविका र आधारभूत आवश्यकतापूर्तिका लागि गठबन्धनले स्थिर सरकार निर्माणको संकल्प गरेको बताउँदै उहाँले वाम गठबन्धनले मात्र मुलुकलाई समृद्ध बनाउन सक्ने बताए ।
मिर्चैया नगरपालिका– ७ स्थित फूलबरियामा भएको चुनावी सभामा उनले भने, ‘एमाले र माओवादी दुवै दलबीच मधेशी, थारु, आदिवासी, जनजाति, महिला, मुसलमानलगायत उत्पीडित वर्गको अधिकारलाई संविधान संशोधनमार्फत थप समाविष्ट गर्ने प्रतिबद्धतासहित गठबन्धन निर्माण भएको हो ।’