बझाङमा जीप दुर्घटना हुँदा एकै परिवारका तीन जनाको मृत्यु

   बझाङ । बझाङमा जीप दुर्घटना हुँदा एकै परिवारका तीनसहित चार जनाको मृत्यु भएको छ। जिल्लाको तलकोट गाउँपालिकाबाट सदरमुकाम चैनपुर जाने क्रममा तलकोट गाउँपालिका–२ मा से १ ज ८४३ नम्बरको जीप दुर्घटना हुँदा चार जनाको मृत्यु भएको हो। जिल्ला प्रहरी कार्यालय बझाङका सूचना अधिकारी एवं प्रहरी निरीक्षक लोकेन्द्रसिंह ठगुन्नाका अनुसार जिप चालक केदारस्यूँ गाउँपालिका–१ रायलका ३३ वर्षीय शमशेर मल्ल, तलकोट गाउँपालिका–४ की ७२ वर्षीया जौमतीदेवी धामी र उनका छोरा ३६ वर्षीय बम्मबहादुर धामी र धामीकै नातिनी ६ वर्षीया बालिका आकृति धामीको मृत्यु भएको हो। तीन जनाको घटनास्थलमै र बालिका धामीको जिल्ला अस्पताल बझाङ लैजाने क्रममा मृत्यु भएको हो। इन्सपेक्टर ठगुन्नाका अनुसार बिहीबार राति दुर्घटना भएको हो। दुर्घटनाको कारण भने खुलेको छैन।