नेपालको अवस्था श्रीलङ्काको जस्तो हुन सक्ने सांसद पाण्डेको चेतावनी

काठमाडौं । नेकपा एमालेका सांसद सुरेन्द्र पाण्डेले हरेक महिना १२ देखि १५ करोड डलर घट्दै गएको बताएका छन् । प्रतिनिधिसभाको बुधबारको बैठकमा आर्थिक वर्ष २०७९–०८० को बजेटमाथिको छलफलमा भाग लिनुहुँदै सांसद पाण्डेले डलरको सञ्चिति घट्ने क्रम जारी रह्यो भने नेपालको अवस्था श्रीलङ्काको जस्तो हुनेसक्ने चेतावनी दिएका हुन ।

‘यस वर्षको हाम्रो नौ अरब ६१ करोड डलर रिजर्भ छ । दुई अर्ब ७० करोड डलरको साउनदेखि अहिलेसम्म डिपोजिट घटेको छ । हरेक महिना १२ देखि १५ करोड डलर घट्दैछ’ उनले भने, ‘‘डलरको डिपोजिट घटिरह्यो भने हाम्रो आयात घट्नेछ । हामीले फरेन करेन्सी दिन सक्दैनौं ।’

तपाईंले फरेन करेन्सी दिन सक्नुभएन भने १२ खर्ब ४० अर्ब रेभिन्यू कसरी कलेक्ट गर्न सक्नुहुन्छ ? भनेर उनले प्रश्न गरे । पूर्वअर्थमन्त्री समेत रहेका पाण्डेले कृषि मलको आपूर्तिबिना कृषि उत्पादन कसरी हुनसक्छ भनेर पनि प्रश्न गरे ।

‘सरकारले बजेट मार्फत् धान, मकै, गहुँलगायतका केही कृषिजन्य वस्तुको आयात ३० प्रतिशतले कटौती गर्ने भनेको छ', उनले भने, ‘बजेट पूरै कृषि उत्पादन केन्द्रित भएको भनिएको छ । तर, मल नै नभई कसरी उत्पादन वृद्धि हुन्छ, अर्थमन्त्रीज्यू ? चालू आर्थिक वर्षको भन्दा अझ मल आयातमा बजेट कटौती गरेर कसरी उत्पादन बढाउन सकिन्छ ?’