काठमाडौं । तीन वटा पार्टी मिलेर बनेको राष्ट्रिय प्रजातन्त्र पार्टी (राप्रपा) ले केन्द्रीय कार्यसमिति जम्बो बनाएको छ । यसअघि ३ सय २७ सदस्यीय केन्द्रीय समिति रहेकोमा शनिबार नयाँ ४ सय सदस्य थप गरी केन्द्रीय कार्य समितिको संख्या ७२७ पुर्याएको छ ।
राप्रपा र राप्रपा (संयुक्त) को एकतापछि राप्रपाको केन्द्रीय कार्य समितिमा यो दोस्रो पटक विस्तार गरिएको हो । गत फागुनको तेस्रो साता ती दुई पार्टी एकता भएपछि जेठ २९ गते केन्द्रीय कार्य समिति, केन्द्रीय कार्य सम्पादन समिति र केन्द्रीय सचिवालय कार्य व्यवस्था समितिको गठन भएको थियो ।
राप्रपाले आइतबार जारी विज्ञप्तिमा पार्टीको विधान तथा पार्टी एकीकरण सम्बन्धी आधारपत्र बमोजिम अध्यक्षत्रयको सहमति अनुसार केन्द्रीय कार्य समिति विस्तार गरिएको उल्लेख गरिएको छ ।
एकीकृत पार्टीलाई निर्वाचन आयोगले मान्यता दिएपछि पहिलो पटक केन्द्रीय कार्य समितिको विस्तार गरेको राप्रपाका नेता मोहन श्रेष्ठले बताए ।
पार्टीका तीन अध्यक्ष कमल थापा, पशुपतिशमशेर राणा र डा. प्रकाशचन्द्र लोहनीको आपसी छलफल र सहमतिमा केन्द्रीय कार्य समितिले पूर्णता पाएको र छिट्टै अन्य पदहरुमा पनि मनोनयन हुने नेता श्रेष्ठले बताए । पार्टीको प्रदेश प्रमुख, कार्यसम्पादन समिति विस्तार लगायतका सबै पदहरुमा मनोनयनका लागि छलफल जारी छ ।
सो पार्टीले असोज २९ गतेसम्म जिल्लास्तरमा समायोजन सम्पन्न गरिसक्ने र आगामी वैशाख २५ देखी २८ गतेसम्म काठमाडौंमा हुने केन्द्रीय महाधिवेशनको तयारीमा लाग्ने बताएको छ ।
को को थपिए हेर्नुहोस सूची
प्रतिकृया दिनुहोस