विद्युत प्राधिकरण भक्तपुरको दादागिरी : चुहावटको बहानामा ग्राहकमाथि खेलबाढ

भक्तपुर । उनै कुलमान घिसिङ हुन्, जले नेपालमा भइरहने लोडसेडिङलाई हटाएर मुलुकलाई झलमल्ल बनाए । तर, उनैको मातहतमा रहेको नेपाल विद्युत प्राधिकरण भक्तपुर वितरण केन्द्र भक्तपुरले भने ग्राहकलाई अनावश्यक रुपमा दुःख दिँदै आएको छ ।

पछिल्ला दिनमा प्राधिकरणले जनताको मन पनि जितिरहेको छ । तर, नेपाल विद्युत प्राधिकरण भक्तपुर वितरण केन्द्रको बदमासीले प्राधिकरणलाई नै बदनाम गराइरहेको छ ।

‘काहीँ नभएको जात्रा हाडी गाउँमा’ त्यसै भनिएको होइन । त्यसमा पनि पदमा पुगेपछि जनतालाई सेवा दिने हो । तर, सेवाका नाममा अनावश्यक दुःख दिने र अनेक बहानामा आफ्नो शक्ति देखाउने काम भइरहेको छ प्राधिकरणको भक्तपुर वितरण केन्द्रमा ।

पछिल्लो दिनमा भक्तपुर वितरण केन्द्रले ग्राहकलाई कसरी अनावश्यक रुपमा दुःख दिइरहेको छ भन्ने कुरा एकपछि अर्काे गर्दै खुल्न थालेको छ । तर विडम्बना, यति हुँदा पनि कुलमान घिसिङ, जो विद्युत प्राधिकरणको सुधार गर्ने खम्बाको रुपमा चिनिएको छन्, स्वयम् उनले पनि त्यतातर्फ ध्यान दिएका छैनन् ।

अर्थात् उनी भक्तपुर वितरण केन्द्रले धेरै राजश्व उठायो भनेर मख्ख परिरहेका छन् । उनले भक्तपुर वितरण केन्द्रले कसरी राजश्ज उठाउँदै छ भनेर कहिले पनि फर्किएर हेरेको पाइँदैन । यसको प्रत्यक्ष मारमा भक्तपुरका ग्राहक परिरहेका छन् ।

यस्ता छन् उदाहरण
उदाहरण नं. १
भक्तपुर जगातीका कृष्ण किसीले घरमा राखिएको विद्युतको क्षमता बृद्धि गर्नु थियो । त्यसकारण उनले शुक्रबार मात्रै नेपाल विद्युत प्राधीकरण विद्युत वितरण केन्द्र दूधपाटी भक्तपुरमा निवेदन दिएका थिए ।

सोही निवेदनका आधारमा आइतबार १ बजेतिर विद्युत प्राधिकरणका कर्मचारी मिटरमा क्षमता बृद्धि गरिदिन किसीको घर आएका थिए । कर्मचारीले मिटर खोले । बाहिर ठिक थियो । तर, बाहिरको बक्स खोलेपछि केहीबेरपछि कर्मचारीले नै यो मिटर ठिक छ कि छैन आफुहरु नै क्लियर नभएको बताए । उनहिरुले भने अनुसार नै उनी नयाँ मिटर ल्याउन पुरानो मिटर बोकेर विद्युत प्राधिकरणतिर लागे ।

उनी त सोही दिन नयाँ मिटर आउँछ भनेर प्राधिकरण पुगेका थिए । तर, कार्यालय पुगेको आधा घण्टापछि उनीमाथि यस्तो आरोप लाग्यो, जुन उनले कल्पनासमेत गरेका थिएनन् । उनीमाथि नखाएको विष लाग्यो । अर्थात् उनीमाथि विद्युत चुहावट गरेको आरोप लाग्यो ।

यतिसम्मकी उनले अहिलेसम्म नगरेको कसुरवापत पनि ३० हजार जरिवाना गर्न खोजियो । उनले आफुले कुनै कसुर नगरेको बताउँदै गर्दा नेपाल विद्युत प्राधिकरणका भक्तपुर प्रमुख प्रज्वलमान श्रेष्ठले ‘तपाईले कुनै कसुर नगरेको भए ल त म तपाईलाई १५ प्रतिशत छुट गरिदिन्छु’ भन्ने जवाफ दिँदा उनी तिनछक्क मात्रै परेका छैनन्, कहिले नगरेको कसुरमा जरिवाना तिर्नुपर्ने बाध्यता आइपर्दा जिन्दगीभर गरेको इमान्दारीताप्रति नै पछूतो मान्न थालेका छन् ।

उदाहरण नं. २
भक्तपुर नगरपालिका वडा नं ८ लिवाली भक्तपुरकी मोहनकेशरी छेतलाले आफनो घरमा विद्युत बिग्रेको भन्दै नेपाल विद्युत प्राधिकरण भक्तपुर वितरण केन्द्र, भक्तपुरमा निवेदन हालिन् । विद्युत मिटरको मुख्य स्विच तल झरेर छिनछिनमा विद्युत बन्द हुने गरेको भन्दै मर्मत सुधारका लागि निवेदन दिइन् ।

उनको निवेदनअनुसार वितरण केन्द्रका कर्मचारी घरमा बिजुली बनाउन गए । तर विडम्वना, उनको विजुली नबनाई कर्मचारीले मिटर उठाएर वितरण केन्द्रको जिल्ला कार्यालय दूधपाटी भक्तपुरमा पठाए ।

मिटर लगेपछि उनी कार्यालय पुगिन् । तर उनलाई विद्युत चुहावट गरेको भन्दै ६५ हजार रुपैयाँं जरिवाना सहितको विल थमाइयो । उनले कार्यालयका हाकिमसँग बिन्ति बिसाइन् । बल्लबल्ल ४५ हजार रुपैयाँ जरिवाना तिराएर घरमा मिटर जडान गरियो ।

उदाहरण नं. ३
भक्तपुर नगरपालिका वडा नं ७ हर्कबहादुर मानन्धरले पनि भूकम्पले जीर्ण आफनो घर नजिककै भत्किएपछि तार चुडियो । उनको घरमा बिजुली बलेन । उनले पनि नेपाल विद्युत प्राधिकरण भक्तपुर वितरण केन्द्रमा निवेदन हाले । निवेदनअनुसार उनको पनि घरमा बत्ति बनाउन कर्मचारीहरु आए ।

तर उनको पनि त्यही घटना भयो, जुन घटना किसी र छेतलाले भोगेका थिए । । घर भत्केर तार चुडेर बती नबलेको बनाउन आएका कर्मचारीले उनको पनि मिटर उठाएर लगिदिए । र, उनलाई विद्युत चुहावट गरेको भनेर जरिवाना तिराइयो ।

धेरै छन् पीडित
किसी, छेतला र मानन्धर त उदाहरण मात्रै हुन्, हिजोआज भक्तपुरमा दैनिक दर्जनौं ग्राहकहरु यही पीडामा छन् । घरमा विद्युत बिग्रियो भनेर निवेदन हाल्नु भनेको अहिले घरमा चुहावट गरेको छु, पक्रन आउनुहोला भनेर निवेदन हाल्नु जस्तै भएको छ ।

नियमसंगत निवेदन हाली काम गराउँं भन्दा उल्टो अपराधी बन्नुपर्ने अवस्था छ । यसले बेनियम कर्मचारीलाई यतिकै घुस खुवाई काम गराउने परिपाटीलाई मलजल मिलेको पीडितको भनाई छ ।

घरमा कर्मचारी बिजुली बनाउन आउँदासम्म मिटर ठिक हुन्छ । तैपनि एक पटक केही भएको छ कि भनेर तपाई आफंैले अफिसमा देखाएर लानुहोस् । ठिक छ भने यही राखिदिउँला नभए नयाँ मिटरको पैसा तिरेर नयाँं मिटर राखिदिउँला भनी झुक्याएर चुहावटमा पार्ने गर्दै गरेको पाइएको छ ।

निरअराधी जति फस्दै
मिटर हराए वा मिटर बिग्रिए लगायतका जुनसुकै मुद्धालाई पनि विद्युत चुहावट अन्तर्गत एउटै कागजमा अपराध कवोल गराउँदा निरअपराध पनि अपराध कवोल गर्न बाध्य छन् । पहिला नै तयार पारिएको उक्त पत्रमा ‘विद्युत प्राधिकरणका कर्मचारी छड्के चेकजाँच गर्न आउँदा बिद्युत चुहावट गरेको पाइए र अपराध गरेकोले त्यो अपराध कसुर गरी तल उल्लेखित भए अनुसारको दण्ड जरिवाना रकम तिर्न मञ्जुर छ’ भन्ने भावको व्यहोरा उल्लेख छ ।

मिटरसँग सम्वन्धित सबै मुद्धाहरुलाई यसैमा सगोल गरी राख्दा बिद्युत चुहावट नगरेका निर्दोषहरु पनि बिजुली बाल्न अपराध कबोल गर्न बाध्य भइरहेका छन् । पहुँचअनुसार चुहावटको बिल बनाएर मनोमानी गर्ने भएकाले सामान्य जनता झनै बढी पीडित हुने गरेको पीडितहरुको भनाई छ ।

नेपाल विद्युत प्राधिकरण भक्तपुर वितरण केन्द्र, भक्तपुरका प्रमुख प्रज्वलमान श्रेष्ठ विद्युत चुहावट नगरेको प्रष्ट भए पनि प्राविधिक कारणले विद्युत चुहावटमा पार्न आफूहरु बाध्य भएको बताउँछन् । ‘मिटर बिग्रेने बित्तिकै चुहावट गरेको हो भन्न सकिन्न तर मिटर बिग्रिने बित्तिकै चुहावटमा पर्छन्’ उनी भन्छन्, ‘त्यसकारण कोही निदोष पनि चुहावटमा परेर फसेका होलान् ।’