प्रचण्ड भन्छन्, ‘यही सरकारले मेलम्चीको पानी ल्याउँछ

काठमाडौं । नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले अब कडा कदम चालेरै भए पनि मेलम्चीको पानी काठमाडौं ल्याएर छाड्ने बताएका छन् । 

काठमाडौं उपत्यका खानेपानी लिमिटेड कर्मचारी संगठनको प्रथम अधिवेशन कार्यक्रमको उद्घाटन गर्दै अध्यक्ष प्रचण्डले आफू र प्रधानमन्त्रीले हस्तक्षेप गरेर भए पनि मेलम्ची ल्याई छाड्ने बताएका हुन् । उनले केही व्यक्तिहरु नै मेलम्ची आउन नदिन लागिपरेको बताउँदै नेकपा नेतृत्वकै सरकारको पालामा मेलम्चीको पानी आइपुग्ने बताए । 

‘म र प्रधानमन्त्री हामी दुवै हस्तक्षेप गरेर भए पनि मेलम्ची ल्याउन दृढ छौं’ उनले भने, ‘म आफू प्रधानमन्त्री भएका बेला मेलम्ची आयोजनाको स्थलगत अनुगमनमा जाँदा केही मानिसहरुले मेलम्ची आउन अझै एक दुई वर्ष लाग्छ भनेका थिए ।’

सबैले सबैको अस्तित्व स्वीकार गरेपछि मात्र राष्ट्रिय एकता मजबुत र राष्ट्रिय स्वाधिनता सुदृढ हुनेसमेत उनले बताए । ‘एउटा जाति, एउटा भाषाले अरू जाति र भाषालाई अपमान गर्ने, विभेद तथा अन्याय गर्ने थितिको अन्त्य गरेर राष्ट्रिय एकता मजबुत हुन्छ’ उनले भने, ‘यो एक किसिमको रोग जस्तै भए पनि हामी यसलाई दृढतापूर्वक सम्पन्न गर्ने अवस्थामा छौँ । जरुरी पर्ने हो भने, यसलाई अप्रेशन नै गर्ने, अप्रेशन गर्न ढिलाई नगरी मेलम्ची ल्याउने भन्नेमा हामी दृढ नै छौं ।’

‘मेलम्ची नआओस् भनेर केही मान्छे लागेका छन्’ उनले भने, ‘प्रधानमन्त्री र मन्त्रीको तत्परतामा शंका छैन । तर विगतका अनुभव हेर्दा बलियो हात नचलाई, कठोर कदम नचलाई मेलम्चीको पानी आउन गाह्रो छ ।’