‘नेकपाको भन्दा कांग्रेसको जलपान सस्तो, लड्डु र केरा कम’
ललितपुर । चाडपर्वको अवसरमा शुक्रबार शुभकामना आदानप्रदान तथा चियापान कार्यक्रम प्रमुख प्रतिपक्षी दल नेपाली कांग्रेसले गरेको छ ।
चियापानमा सहभागीहरु कांग्रेसका शीर्ष नेताहरुसँग हात मिलाउने अवसरसँगै चिया र खाजाको स्वाद पनि लिएका छन् । खाजामा समोसा, नमकिन, जेरी र चियाको व्यवस्था गरिएको छ । खाजाको प्रबन्ध बसुन्धरामा रहेको दियालो फुडल्याण्डले गरेको हो । चिया र खाजा गरी एकभागको एकसय रुपैयाँ परेको फुडल्याण्डले जनाएको छ ।
यसअघि गएको शनिबार नेकपाले गरेको चियापानमा एकभाग बराबर एकसय ५० रुपैयाँ परेको थियो । नेकपाको चियापानमा लड्डु र केरासमेत समावेश थियो ।
कांग्रेसको जलपानमा आउनेहरुको संख्या धेरै भएकाले केन्द्रीय कार्यालय, सानेपाको हलमा पाक्दै गरेको तात्तातो समोसा नै सहभागीहरुको हातहातमा दिइएको थियो । त्यतिमात्रै होइन, मानिसहरुको घुइँचो लागेपछि कांग्रेस प्रवक्ता विश्वप्रकाश शर्मा आफै ‘हामी सबै आयोजक, जे छ त्यही लिऔँ है’ भन्दै लाइनमै पुगेर सहभागीहरुलाई स्वागत गरिरहेको थियो ।
पछिल्लो समय पार्टीहरुले चियापानका नाममा नचाहिँदो खर्च गरेको भनेर आलोचना हुने गरेको छ । नेकपाले आफ्नो चियापानमा ५० हजारलाई निम्ता पठाएको थियो भने कांग्रेसले झण्डै एक लाखलाई जलपानको निम्तो पठाएको थियो ।
प्रतिकृया दिनुहोस