अंग्रेजलाई हराएको दिनको सम्झनामा यसरी मनाइयो २००औँ विजयोत्सव (तस्बिर)

पाल्पा । नेपाली फौज अंग्रेजसंगको युद्धमा विजयी भएको दिनको सम्झनामा सोमबार पाल्पाको तानसेनमा श्रीरणउजिरेश्वरी भगवतीको २०० औँ विजयोत्सव मनाइएको छ ।

नेपाली सेनाका प्रधानसेनापति पूर्णचन्द्र थापा, प्रदेश नम्बर ५ का संस्कृति तथा पर्यटन मन्त्री लिला गिरि, प्रदेश ५ का सभामुख पूर्ण घर्तीमगरलगायतको उपस्थितिमा विजय उत्सव मनाइएको हो ।

नेपाल एकीकरणको समयमा तात्कालीन प्रशासक कर्णेल उजिर सिहं थापाले कृष्ण जन्माष्टमीको भोलिपल्ट मनाउन सुरु गरेको जात्रा हरेक वर्ष मनाइँदै आइएको छ ।

अंग्रेज फौजसँग बुटवलको जितगढीमा भएको लडाईँमा युद्धमा जानु अघि थापाले विजयी भएमा मन्दिर बनाएर प्रत्येक वर्ष सिन्दुर जात्रा गर्ने भाकल गरेको र विजयपश्चात जात्रा मनाउन सुरु भएको इतिहासमा उल्लेख छ ।