१६ कट्ठा १६ धुर जग्गाका लागि बुहारी कै अपहरण !

लहान । सिरहामा एक एकल महिला अपहरणमा परेको दुई हप्ता हुन लाग्यो । तर, अझैं अपहरण गर्ने अपहरणकारी पत्ता लाग्न सकेको छैन । यतिसम्मकी अपहरणकारी खोज्न प्रहरीले समेत चासो दिएको छैन ।

गोलबजार नगरपालिका–१० चोहर्बाकी ५५ वर्षीया कारीदेवी यादव गत साउन २५ गते घरबाटै अपहरणमा परेको भनिएको छ । प्रहरीले अपहरणकारी पत्ता लगाउन नसकेको भन्दै स्थानीयले गोलबजारमा प्रदर्शन गरेका छन् । तर, प्रहरीले खोजी गर्न चासो नदिएको स्थानीयको गुनासो छ ।

अपहरणमा परेकी महिलाको अवस्था प्रहरीले पत्ता लगाउन नसकेपछि सिरहाका आधा दर्जन संघसंस्थाले प्रेस विज्ञप्ति निकालेर घटनाप्रति ध्यानाकर्षण भएको जनाएका छन् । यी संघ संस्थाले कारीदेवीको अवस्था पत्ता लगाउन र दोषी पहिचान गरी कडा कारबाही गर्न माग गरेका छन् ।

आक्रोशित स्थानीयले भने घटनाको १० दिनपछि आरोपितलाई नियन्त्रणमा लिई गोलबजार प्रहरीलाई बुझाएका छन् । स्थानीयले उनीहरूलाई नियन्त्रणमा लिई बुझाएपछि अनुसन्धान थालिएको गोलबजारका प्रहरी सहायक निरीक्षक मनीष कार्कीले बताए।

यस्तो कारण
सम्पत्तिको लोभमा कारीदेवीको अपहरण आफन्तबाटै भएको स्थानीयको आशंका छ । जग्गा हडप्न कारीदेवीको अपहरण आफन्तले नै गरेको दाबी उनीहरूले गरेका छन् ।

स्थानीयका अनुसार वर्षदिनअघि निधन भएका ससुराका नाममा जेठाजुले लुकाएको १६ कट्ठा १६ धुर जग्गामा अंश दाबीसहित सिरहा जिल्ला अदालतमा अंश मुद्दा दायर गरेकी थिइन् । उनी मुद्दा जितेपछि जेठाजु र जेठाजुका छोराले कुटपिट गरेका थिए ।

त्यति मात्रै होइन, जग्गाका लागि दबाब दिँदै आएका थिए । तर, उनी जग्गा नलिई नछाड्ने अडानमा बसेपछि अपहरणमा परेको स्थानीयको दाबी छ । उनीहरूले जेठाजु रामदेव यादव र उनका छोरो लक्ष्मण यादवले अपहरण गरेको दाबी गरेका छन् ।

उनका अनुसार अपहरणमा परेकी महिलाका आफन्तले किटानी जाहेरीसमेत दर्ता गराएका छन् । ‘अपहरणमा परेको दिनदेखि नै अनुसन्धान गरिरहेका थियौं’, उनले भने, ‘तर, केही पत्तो चलेन। स्थानीयले उनका जेठाजु र छोरालाई बुझाउनुका साथै पीडितका आफन्तले उनीहरूमाथि नै किटानी जाहेरी दिएपछि अनुसन्धान सुरु गरेका छौं ।’