दलितको क्षेत्रीय सम्मेलन काठमाडौंमा सुरु

काठमाडौं । दक्षिण एसियाका दलित समुदायको क्षेत्रीय सम्मेलन काठमाडौंमा सुरु भएको छ ।

सो सम्मेलनमा नेपाल, भारत, बंगलादेश, पाकिस्तान लगायतका देशहरुबाट दलित तथा मानव अधिकारकर्मीहरुको सहभागिता रहेको छ । सोसम्मेलन तीन दिनसम्म हुनेछ ।

राष्ट्रिय मानवअधिकार आयोग र दलित महिला संघद्धारा आयोजित सो सम्मेलनको राष्ट्रिय मानवअधिकार आयोगका अध्यक्ष अनुपराज शर्माले उद्घाटन गरे । उद्घाटनमा शर्माले संविधान र कानुनमा जातीय विभेद अन्त्य गरिए पनि व्यवहारमा अन्त्य गर्न नसकिएको बताए ।

सो सम्मेलनमा प्रतिनिधिसभा सांसद निरा जैरु, सर्वोच्च अदालतकी न्यायाधिश सपना मल्ल प्रधान, दलित महिला संघकी संस्थापक अध्यक्ष दुर्गा सोव लगायतले जातीय भेदभाव तथा छुवाछूत नेपालको मात्र समस्या नभएर दक्षिण एसियाका देशहरुमा बिद्यमान रहेकाले संयुक्त संघर्षको जरुरी रहेको औल्याएका थिए ।