महोत्तरीमा १ महिलाको हत्या, २ जना पक्राउ

महोत्तरी । महोत्तरी जिल्लाको पिपरा गाउँपालिका–१ ढेकहा गाउँमा बुधबार १ महिलाको हत्या भएको छ ।

पिपरा गाउँपालिका–१ ढेकहा गाउँ बस्ने श्याम महतोको ३० वर्षीया पत्नी रीता देवी को मृत्यु भएको छ ।

जिल्ला प्रहरी कार्यालय महोत्तरीका प्रहरी नायब उपरीक्षक खगेन्द्रबहादुर खड्काका अनुसार जीउभरि निलडाम र चोटपटक लागेको अवस्थामा रीताको शव उनको आफ्नै कोठामा झुण्डिएको फेला परेको हो ।

स्थानीय छिमेकीसँग प्रहरीले सोधपुछ गर्दा रीता देवीकी सासू मन्तोरिया देवी र नन्द शान्तिदेवीसँग उनको ठूलो झगडा परेको तथा सासू र नन्दले रीतालाई मरणासन्न हुनेगरी कुटपिट गरेका थिए ।

स्थानीयले रीता कसरी घरमा झुण्डिइन् वा झुण्डयाइएको हो र उनको मृत्यु कुटपिटबाट भएको वा अन्य कुनै कारणबाट भएको भन्नेबारे जानकारी नरहेको प्रहरी नायब उपरीक्षक खड्काले बताए ।

प्रहरीले रीताको मृत्यु कुटपिटबाट भएको हुनसक्ने आशंका गर्दै अनुसन्धानका लागि मृतक रीताकी सासू र नन्दलाई बुधबार साँझ पक्राउ गरी ल्याएको छ ।

घटनाबारे विशेष अनुसन्धान भइरहेको जिल्ला प्रहरी कार्यालय महोत्तरीले जनाएको छ ।