बाग्लुङको बुर्तिवाङ बजारका दर्जन घर पहिरोले पुरिए

बागलुङ । बुर्तिवाङ बजारमाथिबाट खसेको पहिरोका कारण एक दर्जन बढी घरहरु पुरेको छ । मंगलबार दिउँसोदेखि परेको अविरल वर्षाका कारण गएको पहिरोले बजारका घरहरु पुरेको हो ।

पहिरोका कारण मानवीय क्षती नभएपनि धेरैको बास गुमेको छ । बुर्तिवाङ अस्पतालको पहिलो तल्ला ढुंगामाटोले पुरिएको छ । पहिरो खस्न थालेपछि धेरैले भागेर ज्यान बचाएको ईलाका प्रहरी कार्यालयका निरिक्षक ओमप्रकाश यादवले बताए।

यस्तै पहिरोले मध्यपहाडी लोकमार्गको केही खण्ड पनि पुरेपछि बुधबार रात्री सेवा र बिहीबार बिहान छुट्ने सवारी अलपत्र परेको प्रहरीले बताएको छ ।

प्रहरी र स्थानीयले रातिदेखि नै उद्दारको काम थालेका थिए। प्रहरीका अनुसार ११ घरमा पूर्ण क्षति, १२ घरमा आंशिक क्षति पुगेको हो। त्यस्तै २ वटा ग्रील उद्योग, १ फर्निचर र १ कुटानी पिसानी मिल पुरिएको छ।

बजारभर हिलो पसेकोले पैदल हिँड्न पनि सास्ती भएको छ। तल्लो बजार तर्फको जनजीवन कष्टकर भएको यादवले बताए। पहिरो पीडितहरुको खाद्यान्न, लत्ताकपडा र पशुचौपाया समेत पुरिएका छन्। धेरैजसोले पालेका कुखुराहरु सबै पुरिएको सुवेदीले बताए। प्रहरीले उद्दारको काममा खटिने बाहेकलाई सुरक्षित स्थानमा बस्न भनेको छ ।

बजारदेखि भवरेटा जाने ग्रामीण सडक खनेको ट्रयाकबाट पानी सोहोरिएपछि बजारमा पहिरो चलेको प्रहरीले बतायो। पानीले ढुंगा, माटो एकैसाथ ल्याएकोले ठूलो पहिरोको रुप लिएको हो।