ज्वरोलाई हेल्चेक्र्याई नगर्नुस्, भाइरल इन्फ्लुएन्जाको संक्रमण हुनसक्छ

काठमाडौं । के तपाई अहिले सामान्य ज्वरो त हो नि भनेर जाँच नगरी त बस्नु भएको छैन ? त्यसो हो भने हेल्चेक्र्याई नगर्नुस् । किनकी सामाज्य ज्वरो आउँदा पनि भाइरल इन्फ्लुएन्जाको संक्रमणले च्यापिसकेको हुनसक्छ ।

सामान्य ज्वरो आउँदा पत्रकार यादव थपलियाको मृत्यु भयो । चिकित्सकहरूका अनुसार पत्रकार थपलिया मात्र होइन, उनीजस्तै धेरै बिरामीलाई भाइरल इन्फ्लुएन्जाले आकस्मिक रूपमा मृत्युको मुखमा लैजाने गरेको छ ।

वर्षायामको सुरुवातसँगै भाइरल प्रकोपबाट बालबालिका र ज्येष्ठ नागरिकका साथै श्वासप्रश्वासका बिरामीहरू बढी जोखिममा पर्ने गरेका छन् । चिकित्सकहरूका अनुसार नेपालमा भाइरल इन्फ्लुएन्जा ए र बीको जोखिम बढी छ ।

पश्चिमी देशमा विशेष गरी जाडो समयमा देखा पर्ने भाइरल इन्फ्लुएन्जा नेपालमा भने वर्षायाम र जाडो दुवै समयमा देखिने गरेको छ । कतिपय देशमा भने बाह्रै महिना भाइरल देखापर्ने गरेको छ ।

शरीर दुख्ने, छाती घ्यारघ्यार हुने, स्वाँस्वाँ हुने र बान्ता समेत हुन सक्छ । कसै–कसैलाई पेट दुख्ने एवं पखाला लाग्ने लगायत लक्षण देखिन सक्छन् । यस्तो लक्षण देखिने वित्तिकै स्वास्थ्य परिक्षण गर्नुपर्ने चिकित्कहकरुहको भनाई छ ।

‘नेपालमा भाइरल इन्फ्लुएन्जा सुरु हुने बेला भइसकेको छ’, सरुवा रोग विशेषज्ञ डा. शेरबहादुर पुन भन्छन्, , ‘निमोनिया हुनुको मुख्य कारण नै फ्लु हो ।’ श्वासप्रश्वास र छातीसँग सम्बन्धित समस्याका दीर्घ रोगीहरूलाई भाइरल इन्फ्लुएन्जाले बढी जोखिममा पार्ने गरेको छ ।

भाइरल इन्फ्लुएन्जा निको पार्ने औषधि अहिलेसम्म बनेको छैन । त्यही भएर चिकित्सकहरुले निको पार्न सहयोग पु¥याउने औषधि दिने गरेका छन् । सतर्कता अपनाउन भ्याक्सिन लगाउनुपर्ने डा. पुनको सुझाव छ ।

भाइरलसँग सम्बन्धित रोगले गर्दा अमेरिकामा बर्सेनी झण्डै ३६ हजार व्यक्तिको ज्यान जाने गरेको तथ्यांक छ ।

भाइरल इन्फ्लुएन्जाका लक्षणहरू

१. ज्वरो आउने
२. खोकी लाग्ने
३. टाउको तथा घाँटी दुख्ने
४. शरीर दुख्ने
५. बान्ता हुने
६. छातीमा घ्याघ्यार तथा स्वाँस्वाँ हुने
७. पेट दुख्ने