सञ्चार मन्त्रीको हास्यास्पद जवाफ, महासचिव विष्णु पौडेल त ठगीमा पर्नुभयो

काठमाडौं । बालुवाटार त्यसमा पनि प्रधानमन्त्री निवासभित्रैको जग्गा किनबेच हुन्छ भनेर कसले पत्याउँछ र ? त्यसमा पनि नेकपाका महासचिव विष्णु पौडेल नै यसमा सहभागी होलन् भनेर झन पत्याउने कुरै भएन ।

बालुवाटारमा रहेका प्रधानमन्त्री निवास र प्रधानन्यायाधीस निवास क्षेत्रकै ललिता निवासको जग्गा किनबेचमा सरकारले रोक लगाइसकेको भनिएको थियो । तर, ललिता निवासको जग्गा सत्तारुढ नेकपाका महासचिव विष्णु पौडेलले समेत किनेको पाइएपछि निक्कै हल्लीखल्ली मच्चिएको छ । यतिसम्मकी सरकारका प्रबक्ताले नै त्यसको बचाउ गर्न बाध्य भएका छन् ।

यतिसम्मकी सरकारका प्रवक्ता सूचना तथा सञ्चार प्रविधिमन्त्री गोकुल बाँस्कोटाले प्रधानमन्त्री निवास रहेको बालुवाटारको जग्गा किनबेचमा पीडित बनेकाहरुलाई क्षतिपूर्ति दिनुपर्ने दावी पनि गरेका छन् । ‘नेकपाको महासचिवले यस विषयमा वक्तव्य जारी गरिसक्नुभएको छ । उहाँ फर्जी धन्दामा संलग्न भएको होइन । कसैको नाममा भइसकेको जग्गा किनेको हुँ भन्नुभएको छ’ उनले भने, ‘उहाँले त ठगीमा पर्नुभयो, उहाँ अपराधी होइन ।’

नक्कली कागज बनाएर प्रारम्भिक तहमा जसको नाममा जग्गा आयो र जसले त्यसमा भूमिका खेले, उनीहरुमाथि कारबाही हुने उनले बताए । मन्त्री बास्कोटाले भने, उहाँ (पौडेल) त पीडित भइसक्नुभो । उहाँले जग्गा किन्नुभयो, जग्गा परेछ नक्कली ।’

उनले नक्कली कागजात खडा गरेर जग्गा बिक्री गर्नेलाई कारबाहीको दायरामा ल्याइने बताए । मन्त्रिपरिषद् बैठकको निर्णय सार्वजनिक गर्दै उनले जग्गा किनबेचबारे छानबिन गर्न बनेको शारदाप्रसाद त्रिताल नेतृत्वको समितिको सिफारिसअनुसार त्यहाँको जग्गा यसअघि नै सरकारले किनबेचमा रोक्का लगाइसकेको पनि बताए ।

नक्कली कागजातका आधारमा झुक्याएर जग्गा बेच्नेलाई कारबाहीको दायरामा ल्याएर त्यसबाट पीडित बनेकालाई क्षतिपूर्ति भराउने पनि उहाँले बताए ।

‘सत्तारुढ दलका महासचिव हुँदैमा यदि फर्जी काममा विष्णु पौडेल रहेको फेला परे उहाँ पनि कारबाहीको दायरामा पर्नुहुन्छ’, बाँस्कोटाले भने, ‘यसमा सत्तारुढ प्रतिपक्षी जो सुकै होस् कोही कसैले उन्मुक्ति पाउँदैन ।’