इन्धन वितरणमा कोटा प्रणाली हट्यो, मागेजति तेल पाउने

काठमाडौं । इन्धन वितरणमा लागू गरेको कोटा प्रणाली नेपाल आयल निगमले हटाएको छ ।

चालकहरुले आन्दोलन फिर्ता लिएपछि निगमले आइतबारबाट कोटा प्रणाली हटाएको हो ।

कोटा प्रणाली हटेसँगै आइतबारबाट उपभोक्ताले मागेजति तेल पाउने नेपाल आयल निगमका निमित्त कार्यकारी निर्देशक सुशील भट्टराईले जानकारी दिए ।

भट्टराईले भने, ‘इन्धन आपूर्ति सहज हुँदै गएकाले आजबाट कोटा प्रणाली हटाइएको छ । मागे जति तेल दिन हामीले पेट्रोल पम्पहरुलाई भनेका छौं ।’

इन्धन अभावले पेट्रोल पम्पमा लाम लागेपछि निगमले दुई दिनअघि असोज ५ बाट लागू हुनेगरी मोटरसाइकल, स्कुटरलाई बढीमा पाँच लिटर र हल्का सवारी साधन कार, भ्यानलाई बढीमा १५ लिटर पेट्रोल दिनेगरी कोटा निर्धारण गरेको थियो ।

त्यसैगरी डिजेलबाट चल्ने छोटा दूरीका सवारी साधनलाई बढीमा ५० लिटर र लामो दूरीका सवारी साधनलाई बढीमा १०० लिटरसम्म मात्रै डिजेल उपलब्ध गराइएको थियो ।