भारतीय सिने जगतका ‘ट्राजिडी किङ’ दिलिप कुमार अस्पताल भर्ना

काठमाडौं । भारतीय सिने जगतका सुपरस्टार दिलिप कुमार गम्भीर बिरामी भएपछि अस्पताल भर्ना भएका छन् । ९५ वर्षीय दिलिप कुमार मुम्बईको लिलाभाटी अस्पतालमा भर्ना भएका हुन्।

भारतीय संचार माध्यमका अनुसार दिलिप कुमारलाई मुटुमा समस्या देखिएको छ । यद्यपी उनको स्वास्थ्य अवस्था यतिबेला सामान्य अवस्थामा फर्किरहेको बताइएको छ। ‘ट्राजिडी किङ’का रुपमा परिचित दिलिप कुमार भारतीय सिने उद्योगका एक इतिहास मानिन्छन् ।

उनले सन् १९९८ मा सिने जगतबाट सन्यास लिएका थिए । उनको अन्तिम चलचित्र किला थियो । यसअघि उनले सर्वाधिक रुचाइएका नयाँ दौर, मुगल इ अजम, देवदास, अन्दाज, बिधाता, शक्ति, कर्मा, जस्ता सुपरहिट चलचित्रहरुमा अभिनय गरेका थिए। भारतीय चलचित्र क्षेत्रमा उल्लेखनीय योगदान दिएका दिलिप कुमारलाई सन् २०१५ मा ‘पद्म विभूषण’बाट सम्मान गरिएको थियो।