महानगरपालिकाकै आँगनमा भाँसियो सडक, बनाउन केही दिन लाग्ने (फोटो फिचर)

काठमाडौं । काठमाडौँ महानगरपालिकाको कार्यालय अगाडि टुकुचा खोला माथिको सडक भासिएको छ । काठमाडौँ महानगरपालिका कार्यालय नजिकै रहेको सडक भासिएपछि सडक अवरुद्ध भएको छ ।

दरबारमार्गस्थित महेन्द्र सालिकबाट कमलादीको कृष्ण पाउरोटी चोक निस्किने सडकखण्ड भासिएको हो । यो सडक एकतर्फी रुपमा सञ्चालन हुँदै आएको थियो । यो बाटो सडक विभागअन्तर्गत पर्दछ ।

यो सडकले दरबारमार्गलाई जोड्छ । टुकुचा खोलामाथि रहेको यो सडक राति नै भासिएको महानगर प्रहरीले जनाएको छ । प्रहरीका अनुसार भासिँदा हिजो रातिदेखि नै उक्त बाटो बन्द भएको छ ।

यो सडक यसअघि पनि भासिएको थियो । त्यतिबेला अस्थायी रुपमा मर्मत गरिएको थियो । महानगरपालिकाका एक कर्मचारीका अनुसार सडक विभागले सडक बनाउन केही दिन लाग्ने जानकारी महानगरलाई गराएको छ ।

ती कर्मचारीका अनुसार सडकमा धेरै क्षति पुगेकाले अस्थायी रुपमा मर्मत गर्न नमिल्ने देखिन्छ । ‘सडकबाट हेर्दा टुकुचा खोला देखिन्छ । अब तलैबाट बेस उठाएर सडक बनाउनुपर्ने देखिन्छ’, महानगरका एक कर्मचारीले भने ।