सैनिक अस्पतालमा निःशुल्क हेमोडायलाइसिस सेवा सुरु  

काठमाडौँ । नेपाली सेनाद्वारा सञ्चालित काठमाडौँको छाउनीस्थित वीरेन्द्र अस्पतालमा काठमाडौँ महानगरवासी मिर्गौला रोगीका लागि निःशुल्क हेमोडाइलाइसिस सेवा सुरु भएको छ।

आइतबार अस्पताल परिसरमा एक समारोहकाबीच काठमाडौँ महानगरपालिकाका प्रमुख विद्यासुन्दर शाक्य र प्रधान सेनापति पूर्णचन्द्र थापाले निःशुल्क हेमोडाइलाइसिस सेवाको संयुक्त रुपमा शुभारम्भ गरेका हुन्।

काठमाडौँ महानगरपालिकाको आर्थिक सहयोग र नेपाली सेनाको व्यवस्थापनमा वीरेन्द्र अस्पताल छाउनीमा आइतबारदेखि मिर्गौलाका (Sero Negative) बिरामीका लागि निःशुल्क हेमोडाइलाइसिस सेवा सुरु भएको हो।

सेवा शुभारम्भपछि संक्षिप्त प्रतिक्रिया दिँदै महानगरका प्रमुख शाक्यले महानगरवासीलाई स्वास्थ्य सेवा दिने प्रयास स्वरुप अस्पतालसँग सहकार्य गरेको बताए।  मिर्गौला सम्बन्धी रोग लाग्नु भन्दा अगावै त्यसलाई रोक्न वा रोग लागिसकेको भए थप बिग्रन नदिन यसै वर्षदेखि ‘स्वस्थ मिर्गौला–स्वस्थ काठमाडौँ’ कार्यक्रम अन्तर्गत ३२ वटै वडाहरूमा प्रारम्भिक परीक्षणको सेवा सुरु भइसकेको बताए।

महानगरले सेवा सञ्चालनका लागि आवश्यक भौतिक पूर्वाधार, ८ ओटा हेमोडायलाइसिस मेसिन, एउटा रिप्रोसेसिङ मेसिन, पानी शुद्धीकरण प्लान्ट र अन्य मेडिकल उपकरणहरू जडान गर्न अस्पताललाई ३ करोड रुपैयाँ अनुदान उपलब्ध गराएको छ। यससम्बन्धी सहकार्यका लागि महानगरपालिका र अस्पतालबीच ५ बर्षका लागि २०७६ पुस २ गते नै सम्झौता भएको थियो।

सम्झौता अनुसार जडान गरिएका ८ वटा हेमोडायलाइसिस मेसिनबाट हरेक हप्ता दुई सिफ्टमा सेवा सञ्चालन गर्न सकिन्छ। तत्कालका लागि ४८ जना बिरामीलाई साताको २ पटक सेवा प्रदान गर्न सकिने अस्पतालका प्रमुख सहायक रथी डाक्टर अरुण शर्माले बताए।

यो सेवा विपन्न र सेरोनेगेटिभ दीर्घ चरणको मिर्गौला रोगी, क्रोनिक किड्नी डिजिज स्टेज – ५ पुगिसकेकाहरुका लागि मात्रै हो। यो सेवा लिनका लागि बिरामीले महानगरपालिकाको सिफारिस आवश्यक पर्छ।

अहिले देशभरिका ६५ वटा अस्पतालहरूमा चालु रहेका ४ सय ९८ वटा डायलासिस मेसिनबाट ३ हजार ५ सय १६ जना विपन्न वर्गका बिरामीहरूले निःशुल्क हेमोडायलाइसिस सेवा प्राप्त गरिरहेको तथ्याङ्क छ।

निःशुल्क डायलाइसिस गर्दा राज्यले प्रति बिरामी वार्षिक २ लाख ६० हजार रुपैयाँ खर्च व्यहोरिरहेको छ। नेपालमा हरेक वर्ष २ हजार ६ सय जना मिर्गौलाका नयाँ बिरामीहरू थपिरहेको सरकारी तथ्यांक छ।