प्रदेश ४ नीति तथा कार्यक्रमः आठ ताल जोड्ने मोनोरेल, कोरलादेखि सुस्तासम्म द्रुतमार्ग

पोखरा । प्रदेश नम्बर ४ मा आगामी आर्थिक वर्ष २०७५/०७६ को लागि नीति तथा कार्यक्रम सार्वजनिक भएको छ । कार्यक्रमले भौतिक पूर्वाधारालई महत्वका साथ समेटेको छ ।

नीति तथा कार्यक्रममा पोखरामा रहेका ८ वटा ताल जोड्ने गरी मोनोरेल संचालन गर्नेदेखि कोरलादेखि सुस्तासम्म द्रूतमार्ग निर्माण गरिनेसम्मका योजना समेटिएका छन्।

प्रदेश प्रमुख बाबुराम कुँवरले शुक्रबार प्रदेशसभामा प्रस्तुत गरेका नीति तथा कार्यक्रमले ८ प्रतिशतको आर्थिक बृद्धिको महत्वकांक्षा लिएको छ भने प्रतिव्यक्ति आय वार्षिक २५ सय अमेरिकी डलर पुर्याउने लक्ष्य लिएको छ ।

कृषि उत्पादनलाई दोब्बर बनाउने, पाँच वर्षभित्र गरिबी ७ प्रतिशतमा झार्ने, प्रदेशको केन्द्रदेखि स्थानीय तहसम्म सडक सञ्जाल बिस्तार गर्ने, उर्जा उत्पादन र खपत बढाउने,प्रदेशभित्रै रोजगारी सिर्जना गर्ने र औद्योगिक क्षेत्रको विकास गर्ने योजना रहेको छ ।

अन्तर्राष्ट्रियस्तरको खेल मैदान निर्माण, बहुउपयोगी सम्मेलन केन्द्र, मुटरोग, मृगौला र क्यान्सर अस्पतालको निर्माण, स्थानीय तहमा २५ र नगरपालिकामा ५० शैयाको अस्पताल निर्माणको थालनी गरिने पनि नीति र कार्यक्रममा उल्लेख छ।

केन्द्रको योजनामा परे पनि ३ वर्षभित्र पोखरा/क्षेत्रीय बिमानस्थल निर्माण, पोखरालाई केन्द्रमा राखी चक्रपथ निर्माणलाई पनि विशेष महत्व दिइएको छ । यो प्रदेशमा सन् २०२२ सम्म २० लाख पर्यटक भित्र्याउने लक्ष्य पनि नीति तथा कार्यक्रमले लिएको छ।