मलेसियाबाट नेपालीले पठाएको करोडौं रकम एजेन्टको झोलामा

काठमाडौंं । नेपाली मजदुरले विप्रेषणमा पठाएको करोडौं रकम मलेसियामै रोकिएको छ ।

हिमालयन बैंकले मलेसियाबाट विप्रेषण ल्याउँदा बीचमा खडा गरेको एजेन्टलाई नियमविपरीत अधिकार दिएका नेपाली मजदुरको रकम रोकिएको हो । बैंकले मलेसियामा विप्रेषणको कारोबार गर्ने गरी म्याक्स मनी नामक एजेन्सीलाई अधिकार दिएको थियो ।

नियम विपरीत म्याक्सलाई २० लाख अमेरिकी डलर चलाउन दिने बैंकको निर्णयका कारण समयमा पैसा नेपाल नआउने गरेको छ, जसले गर्दा बैंकले ग्राहकलाई समयमा पैसा भुक्तानी गर्दैन ।
भुक्तानी गर्नु पर्दा बैंकमा वचत रहेको पैसाबाट विप्रेषणको पैसा भुक्तानी गर्दै आएको छ ।

बैंकले विप्रेषणको काम गर्न हिमाल रेमिट सञ्चालनमा ल्याएको छ । म्याक्स हिमाल रेमिटको एजेन्सी हो । हिमालय बैंकका प्रमुख कार्यकारी अधिकृत अशोकशम्शेर राणाले म्याक्सले डलरको समस्या देखाएर समयमा पैसा नपठाएको बताए ।

उनले अहिले पनि ३० करोड रूपैयाँ म्याक्सबाट आउन बाँकी रहेको बताए । यस्तै उनले दुबईलगायतका देशबाट समेत विप्रेषण नेपाल आउन ढिला भएको स्विकार गरे ।
नेपाली कामदारले नेपाल पठाएको पैसा म्याक्सले बीचमा चलाउन पाउने सम्झौता गरेकाले बैंकले त्यसमार्फत् कुनै सुरक्षण भने लिएको छैन । अहिले पनि म्याक्सले सम्झौताको भन्दा बढी पैसा आफूसँगै राखिरहेको छ ।

राष्ट्र बैंकको निर्देशिकाअनुसार विदेशबाट पठाएको विप्रेषण उक्त समयको विनिमय दरमा नेपाल आएर बैंक खातामा जम्मा भएपछि मात्र पैसा पाउने व्यक्तिलाई भुक्तान गर्नुपर्ने व्यवस्था छ ।

हिमालयन बैंकले राष्ट्र बैंकले गरेको यस्तो व्यवस्था विपरीत म्याक्सलाई पैसा चलाउने अधिकार दिएको हो ।

राष्ट्र बैंकका प्रवक्ता नारायणप्रसाद पौडेल बैंक खातामा विप्रेषण आएको पैसा जम्मा नहुँदासम्म भुक्तानी दिन नपाइने बताए।