कृष्णबहादुर महरा भन्छन्, सुन तस्करीमा आफ्नो कुनै संलग्नता छैन, त्यो फोन नम्बर मेरो होइन

काठमाडौं । पछिल्ला समयमा विभिन्न प्रकरणहरुमा ठूला राजनीतिक दलहरुका शीर्ष नेताहरु धमाधम मुछिएका छन् । जसका कारण ठूला दलभित्रै खटपट पनि भइरहेका छन् ।

एक क्वीन्टल सुन तस्करी प्रकरणमा सत्तारुढ नेकपा माओवादी केन्द्रका उपाध्यक्ष एवं प्रवक्ता कृष्णबहादुर महरा मुछिएका छन् । तर, महराले सुन तस्करीमा आफ्नो कुनै संलग्नता नभएको दाबी गरेका छन् ।

पूर्वसभामुखसमेत रहेका माओवादी नेता महराका बाबु छोरालाई सुन तस्करीमा उन्मुक्ति दिइएको भनी सञ्चारमाध्यममा समाचार आइरहेका बेला महराले बिहीबार बिहान सामाजिक सञ्जालमा लेखेर महराले आफू त्यसमा संलग्न नरहेको जिकिर गरेका हुन् ।

यस क्रममा उनले सुन तस्करीका बिचौलियासँग फोन सम्पर्क गरेको भनी सञ्चारमाध्यममा सार्वजनिक फोन नम्बर आफ्नो नभएको स्पष्टीकरण पनि दिएका छन् । तर उनले आफ्ना छोरा राहुल महराका विषयमा भने केही बोलेका छैनन् ।

‘केही दिनयता सञ्चारमाध्यमबाट सुन प्रकरणमा मेरो नाम जोडिएर आइरहेको विषय यसअघि नै प्रस्ट पारिसकेको जानकारी गराउन चाहन्छु । फेरि पनि थप स्पष्ट गर्न चाहन्छु कि यस कार्यमा आफ्नो कुनै पनि संलग्नता नरहेको स्पष्ट पार्न चाहन्छु’, महराले भनेका छन्,‘जहाँसम्म मैले फोन गरेको भनी मेरो नाम र उल्लेख गरिएको फोन नम्बर मेरो नभएको र मैले प्रयोग नगरेको पनि थप प्रस्ट पार्न चाहन्छु ।’

साथै उनले सुन तस्करी प्रकरण अनुसन्धानमा आफूले पनि सघाउने वचन दिएका छन् । ‘साथै आवश्यक परे निष्पक्ष छानबिनमा सहयोग गर्ने प्रतिबद्धता जनाउँछु’, उनले भनेका छन्, ‘अनावश्यक भ्रममा नपर्न सबैमा हार्दिक आग्रह गर्दछु ।’