एमसिसी अनुमोदन गर्नुपर्ने कांग्रेसको निष्कर्ष, गठबन्धनलाई मनाउने प्रयास

काठमाडौं ।सतारुढ दल नेपाली कांग्रेसले अमेरिकी सहयोग नियोग मिलेनियम च्यालेन्ज कर्पोरेसन (एमसीसी) सँगको सम्झौता गटबन्धनसँगको सल्लाहमै संसदबाट अनुमोदन गराउनुपर्ने निष्कर्ष निकालेको छ ।

१४ औँ महाधिवेशनपछि गठित कार्यसम्पादन समितिको बिहीबार बसेको पहिलो बैठकले एमसीसी सम्झौता संसदबाट अनुमोदन गराउने निर्णयबाट पछि हट्न नसकिने निष्कर्ष निकालेको हो ।

सत्ता गठबन्धनभित्र एमसीसी सम्झौता संसदमा पेश गर्ने वा नगर्ने विषयमै मतभेद भइरहेका बेला कांग्रेसले त्यसलाई अनुमोदन गराउनुपर्ने निर्णय दोहोर्‍याएको हो ।

केन्द्रीय कार्यसम्पादन समितिको बैठकमा बोल्ने नेताहरु एमसीसीको पक्षमा उभिएका छन् । एमसीसीबारे धेरै भ्रम फैलाइएको भन्दै नेताहरुले त्यसलाई चिर्न जनताका माझ जानुपर्ने धारणा राखे ।

बैठकपछि पूर्वमहामन्त्री डा. शशांक कोइरालाले भने, ‘एमसीसीबारे हामीले जनतामा गएर सम्झाउनुपर्छ । एमसीसी नेपालका लागि राम्रो हो, अमेरिकी सेनाहरु आउने होइन । यहाँकै नियम कानुन अनुरुप एमसीसीले ५०० मिलियन डलर ग्रान्ट दिएको हो । यो विद्युत र बाटोका लागि हो भनेर हामीले जनमानसमा भन्नुपर्छ ।’

तर पूर्वउपसभापति विजयकुमार गच्छदारले भने एमसीसी साह्रै गिजोलिएको भन्दै हतारमा निर्णय गर्न नहुने बताएका छन् । उनले प्रधानमन्त्रीसमेत रहेका पार्टी सभापति देउवालाई सत्तारुढ गठबन्धनलाई मनाउन वा अर्को संसदसम्म पर्खिन सुझाव दिए ।

बैठकमा पार्टीभित्रै एमसीसीबारे भ्रम रहेको भन्दै सभापति देउवाले बोल्न समय दिएपछि पूर्वअर्थमन्त्री रामशरण महतले एमसीसी सम्झौता र त्यसका गुण-दोषहरूबारे लामो व्याख्या गरेका थिए । महतलाई सुनेपछि देउवाले एमसीसीबारे फैलाइएका अनावश्यक भ्रम चिर्न नेताहरूलाई आग्रह गरेका थिए ।

कांग्रेसले दुई वर्षअघि नै सभापति शेरबहादुर देउवा नेतृत्वको सरकारले २०७४ मै गरेको एमसीसी सम्झौता संसदबाट अनुमोदन गर्ने निर्णय गरेको थियो ।

जारी बैठकमा बोल्ने अधिकांश नेताहरूले एमसीसी सम्झौताका विरोधीहरूले त्यसबारे तल्लो तहसम्म भ्रम फैलाएकाले सरकारले ती भ्रमहरू चिरेर अघि बढ्नुपर्ने सुझाव दिएका छन् ।