ह्वात्तै बढ्यो कोरोना संक्रमितको संख्या, एकैदिन १ हजार ९६ जनामा संक्रमण पुष्टि, ८ को मृत्यु

काठमाडौँ । नेपालमा पछिल्लो २४ घण्टामा १ हजार ९६ जना कोरोना संक्रमित थपिएका छन्। जसमध्ये १ हजार १५ जनामा पीसीआर र ८१ जनामा एन्टिजेन परीक्षणबाट कोरोना पुष्टि भएको हो।

यससँगै नेपालमा कोरोना संक्रमितको कुल संख्या २ लाख ८४ हजार ६७३ पुगेको छ। स्वास्थ्य मन्त्रालयका अनुसार आइतबार २६२ जना कोरोना संक्रमित डिस्चार्ज भएका छन्।

हाल देशभर ६ हजार २ सय ९० जना सक्रिय संक्रमित रहेका छन्। पछिल्लो २४ घण्टामा ५ हजार ८४ पीसीआर परीक्षण गरिएको छ भने ६ सय ९९ एन्टिजेन परीक्षण गरिएको छ।

मन्त्रालयका अनुसार पछिल्लो २४ घण्टामा कोरोनाबाट थप ८ जनाको मृत्यु भएको छ। देशभर हालसम्म कोरोनाबाट ज्यान गुमाउनेको संख्या ३ हजार ८३ पुगेको छ।

काठमाडौँ उपत्यकामा थप ४३५ जनामा संक्रमण पुष्टि भएको छ। काठमाडौँका ३२६, ललिपुरका ६४ तथा भक्तपुरका ४५ जनामा संक्रमण पुष्टि भएको हो।