आइसोलेसनमा मृत्यु भएका पुरुषका आफन्त नआउँदा महानगरले गर्‍यो शवको व्यवस्थापन

विराटनगर । कोशी अस्पतालको आइसोलेसनमा मृत्यु भएका पुरुषका आफन्त ४ दिनसम्म पनि सम्पर्कमा नआउँदा शवको व्यवस्थापन सोमबार बिहान विराटनगर महानगरपालिकाले गरेको छ ।

मोरङको पथरीशनिश्चरे नगरपालिका–१ स्थित सडकमा छटपटाइरहेका बेला उनलाई प्रहरीले उद्धार गरेर गत बिहीबार राती उपचारका लागि कोशी अस्पताल ल्याएको थियो ।

घर धनकुटा, नाम दीपक शेर्पा र उमेर ५० वर्ष बताउने पुरुषको मृत्यु गत शुक्रबार बिहान भएको थियो । उनको कोरोना परीक्षण रिपोर्ट नेगेटिभ आएको थियो । कोही आफन्त वा परिवारका सदस्य सम्पर्कमा आउँछन् कि भनेर शव तीन दिनदेखि कोशी अस्पतालकै शव गृहमा राखिएको थियो ।

प्रहरीलाई ती पुरुषले आफ्नो नाम दीपक शेर्पा र घर धनकुटा भएको बताएका थिए । ती पुरुष पथरीशनिश्चरे क्षेत्रमा केही समयदेखि ज्यालामजदुरी गरेर जीविका चलाउँदै आएको खुलेको छ ।

उनको मृत्यु भएको ४ दिन बित्दा पनि परिवारका कोही सदस्य सम्पर्कमा नआएको र स्पष्ट ठेगाना पनि खुल्न नसकेपछि सोमबार बिहान महानगरले आवश्यक कानुनी प्रक्रिया पूरा गरेर शवको व्यवस्थापन गरेको हो । अस्पतालले पोस्टमार्टम रिपोर्टसहित महानगरलाई बुझाएको थियो ।

पुरुषमा ज्वरो आउने, खोकी लाग्ने र छात्ती दुख्ने लगायत कोरोनासँग मिल्ने लक्षण देखिएको भन्दै अस्पतालले आइसोलेसनमा भर्ना गरेर उपचार सुरु गरेको थियो । चिकित्सकले स्लाइन चढाउँदै उपचार थालेका थिए । तर शुक्रबार बिहान ७ बजेतिर आइसोलेसन वार्डको बेडबाट भुइँमा खसेर मृत्यु भएको अवस्थामा ती पुरुषलाई फेला पारिएको थियो ।

त्यसपछि मृत्यु भएका पुरुषको स्वाब संकलन गर्दै चिकित्सकले पीसीआर परीक्षणका लागि प्रयोगशालामा पठाएका थिए । शुक्रबार बेलुका रिपोर्ट नेगेटिभ आएपछि शव शव गृहमा राखिएको थियो । तर मृत्यु भएको लामो समयसम्म पनि आफन्त र परिवारका सदस्यको टुँगो नलागेपछि शव व्यवस्थापन गर्नुपर्ने अवस्था आएको अस्पतालका मेडिकल सुपरिटेन्डेन डा. चुमनलाल दासले बताए ।

महामारीकै रुपमा फैलिएको कोरोनाकै त्रास र भयका कारण पनि घटना थाहा हुँदाहुँदै शव जिम्मा लिन आफन्त एवं परिवारका सदस्य नआएको पनि हुन सक्ने प्रहरीको आशंका छ ।