गोंगबु हत्या प्रकरण : अन्तरंग तस्वीरहरु सार्वजनिक हुँदा बोहोराको हत्या
एम्बुलेन्स लिएर कल्पनालाई लिन चितवनबाट भिनाजु गोंगबु आएको खुलासा
काठमाडौं । यही साउन २५ गते बिहान गोंगबुमा सुटकेसभित्र शव फेला परेको थियो । बोहोराको टाउको र खुट्टा भने जेब्रा झोलाभित्र भेटिएको थियो ।
दाङ घर भई काठमाडौं बस्दै आएका कृष्णबहादुर बोहोराको हत्यामा संलग्नको खोजी गर्दै जाँदा प्रहरीले कल्पना मुडभरी (पौडेल) लाई चितवनको माडीस्थित माइतीघरबाट पक्राउ गरेर काठमाडौं ल्यायो ।
काठमाडौं ल्याएपछि सोधखोजका क्रममा उनले नक्कली फेसबुक आईडी बनाएर आफूलाई दुःख दिन थालेपछि हत्या गरेको बताएकी छन् ।
अन्तरंग तस्वीरहरु नक्कली फेसबुक आईडी बनाएर सार्वजनिक गर्न थालेपछि र आफूअनुकूल चल्न दबाव दिन थालेपछि हत्या गरेको वयान दिएकी छन् । उनले गोंगबुस्थित डेरामा बोहराको औषधि खुवाएर हत्या गरेपश्चात एम्बुलेन्स चालकलाई बोलाएर चितवन भागेको बताएकी छन् ।
३७ वर्षीया कल्पनाले हत्या गरेको भोलिपल्ट आइतबार भिनाजुलाई फोन गरेर बोलाइन् । अनि एम्बुलेन्स लिएर कल्पनालाई लिन चितवनबाट भिनाजु गोंगबु आएका थिए ।
कोठामा हत्या गरेर नजिकै शव लुकाएपछि कल्पना आइतबार १५ वर्षीया छोरी र १३ वर्षका छोरा लिएर एम्बुलेन्समा चितवन भागेकी थिइन् । चितवन माइतीघरमा रहेकै बेला कल्पनालाई काठमाडौंबाट खटिएको अपराध महाशाखा र चितवन प्रहरीको टोलीले पक्राउ गरेको थियो । एम्बुलेन्स चालक र दुई छोराछोरी पनि चितवनबाटै पक्राउ परेका हुन् ।
प्रतिकृया दिनुहोस