महामारीले दिएको धक्कालाई एक भएर समाधान गर्न सकिनेमा विश्वका नेताहरु विश्वास्त

काठमाडौं । विश्व नेताहरूले कोभिड –१९ को विश्वव्यापी विपत्तिको घडीलाई छिटो र प्रभावकारी रूपमा सम्बोधन गरेर नयाँ विश्व व्यबस्थाको तयारीमा जुट्न आग्रह गरेका छन् ।

जुलाई ९, २०२० मा दुई घण्टासम्म चलेको अन्तर्राष्ट्रिय समिट काउन्सिल फर पीसको शिखर सम्मेलनमा ८ जना वर्तमान तथा पूर्व राष्ट्र प्रमुख र सरकार प्रमुखहरू एवं ५ जना प्रथम महिलाहरूले सम्बोधन गरेका थिए । जसलाई ६ वटा भाषामा अनुवाद गरिएको थियो । उक्त भर्चुअल शिखर सम्मेलका लागि १०६ राष्ट्रहरुका ९ सय जनाले सहभागिताका लागि नाम दर्ता गरेका थिए ।

युनिभर्सल पिस फेडेरेशन (युपीएफ) एशिया प्यासिफिक द्वारा आयोजित ‘समिट काउन्सिल फर पिस एशिया प्रशान्त भर्चुअल समिट’ मा भर्चुअल सम्मेलनलाइ सम्बोधन गर्ने १३ जना विश्व नेताहरूले कोभिड –१९ ले सृजित चुनौतीहरुलाई नयाँ अवसरका रुपमा रुपान्तरण गर्नुपर्ने बताएका हुन् ।

उनीहरुले बक्ताहरुले यस स्वास्थ्य महामारीले समाजका सबै क्षेत्रलाई ठुलो धक्का दिएकोले यसको समाधानमा पनि सबै एकताबद्ध भएर अघि बढ्नुपर्ने धारणा व्यक्त गरे । ध्रुवीकरण तथा दोषारोपणले चुनौतीको सामनामा कठिनाई सृजना गर्छ भन्दै विश्व नेताहरूले कोभिड –१९ को महामारीलाई एक ‘वेक अप कल’ को रूपमा उनीहरुले व्याख्या गरे ।

विश्व नेता तथा प्रथम महिलाहरूले इन्टरनेश्नल समिट काउन्सिल फर पिसकी संस्थापिका डा. हाक जा हान मुनले विश्वभर शान्ती र भातृत्वको अभिबृद्धि गर्ने कार्यक्रम सञ्चालन गरेर संसारमा आशाको ज्योति प्रदान गरेको बताइन् ।

सम्मेलनको शीर्षक ‘कोभिड –१९ पछिको विश्वको पूनर्निर्माण तथा नवीकरणः अन्तनिर्भरता, पारस्परिक समृद्धि र विश्वव्यापी मूल्यमान्यता’ रहेको थियो ।विश्व नेताहरुले कोभिड –१९ का कारण सृजित सबै चुनौतीमा मानब जातिले छिटै विजय हासिल गर्ने विश्वास व्यक्त गरे ।

कार्यक्रमका मुख्य वक्ताहरूमा श्रीलंकाका प्रधानमन्त्री महिन्दा राजपाक्ष, यूपीएफका अन्तर्राष्ट्रिय नेताहरु डा. थोमस जी. वाल्स र डा. युन योङ्ग हो, गणतन्त्र किरीबाटीका पूर्व राष्ट्रपति एनोटे टोङ, मार्शल द्वीप गणराज्यका पूर्व राष्ट्रपति केसई नोट, भानुवाटुका पूर्व राष्ट्रपति जर्ज सोकोमानु, नेपालका पूर्व प्रधानमन्त्री माधवकुमार नेपाल, सोलोमन टापुका पूर्व प्रधानमन्त्री ड्यानी फिलिप, मंगोलिया र नेपालका पूर्व उपप्रधानमन्त्रीहरु क्रमशः तसेरेन्द्रश औयुनबाटर र सुजाता कोइराला रहेका थिए ।

नेपालका पूर्व उपराष्ट्रपति परमानन्द झाले सभापतित्व गरेको भर्चुअल शिखर सम्मेलनमा एशियाली सांस्कृतिक परिषदले सांस्कृतिक कार्यक्रम प्रस्तुत गरेको थियो ।

अन्तर्राष्ट्रिय समिट काउन्सिल फर पीस, वर्तमान तथा पूर्व राष्ट्र तथा सरकार प्रमुखहरूको अन्तर्राष्ट्रिय संजाल हो । जसले जलवायु परिवर्तन, द्वन्द्व, गरीबी, युद्ध, आतंकबाद, भ्रष्टाचार तथा पारिवारिक विखण्डन जस्ता साझा समस्याहरूको समाधान वार्ता र सहकार्यको माध्यमबाट गर्न पहलकदमी लिन्छ र विश्वका हरेक गम्भीर समस्याहरूलाई सम्बोधन गर्न आफ्ना सिफारिशहरू प्रस्ताव गर्ने गरेको छ ।

उक्त भर्चुअल शिखर सम्मेलनमा नेपाल परिवार दलका अध्यक्ष तथा पूर्व मन्त्री एकनाथ ढकाल सहजकर्ताको भूमिका निर्वाह गरेका थिए ।