विद्यार्थीलाई परिकार खुवाउन कृषिविज्ञ राईले सलह प्रतिकिलो १ सयमा किन्ने
खोटाङ । यतिवेला हावाको वेगसँगै सलह किरा नेपाल भित्रिएपछि कृषकहरु चिन्तामा छन् यही बेला कृषिविज्ञ मदन राईले भने नेपालमा आएका सलहलाई प्रतिकिलो १ सय रुपैयाँमा खरिद गरेर विद्यार्थीलाई विभिन्न परिकार बनाएर खुवाउने बताएका छन् ।
भारतबाट शनिबार बिहान तराई प्रवेश गरेको सलह खोटाङका विभिन्न स्थानीय तहमा एकैसाथ देखिएपछि कृषिविज्ञ राईले सामाजिक सञ्जाल फेसबुकमार्फत प्रतिकिलो १ सयमा खरिद गर्ने बताएका हुन् ।
‘कसैले समाएर ल्याइदिए किलोको १ सयले, एक हजार किलोसम्मको एक लाख भुक्तानी गरिनेछ’, दिक्तेल रुपाकोट मझुवागढी नगरपालिका–२ सोल्मामा सुभद्रा मदन फाउण्डेशन सञ्चालन गरिरहेका कृषिविज्ञ राईले सामाजिक सञ्जालमा लेखेका छन्, ‘माछा मासुको सट्टामा सलह भुटेर विद्यार्थीलाई विभिन्न परिकार बनाएर खुवाउनेछौँ ।’
कृषिविज्ञ राईले आइतबार लेखेको फेसबुक स्टाटसमा भनिएको छ, ‘पक्रेर ल्याएको सलहबाट केही पशुपक्षीको दाना बनाउँछौँ । सिद्राको सट्टामा यसको प्रयोग गर्नेछौँ । केही हामीसँग भएको सबैखाले पक्षीलाई खुवाउने छौँ ।’ उनले सलह किरा नियन्त्रणका नाममा विष किनेर घुस खाने माध्यम नबनाउन र वातावरण विषालु नबनाउन आग्रह गरेका छन् ।
विषले सलह मरे पनि उक्त मरेको सलह खाने पशुपक्षीसमेत मर्ने हुँदा सलह नियन्त्रणका नाममा विष प्रयोग नगर्न सरकारलाई आग्रह गरिएको राईको भनाइ छ । ठूलो समूहमा उडेर एक ठाउँबाट अर्को ठाउँमा पुग्ने सलह हलेसी तुवाचुङ नगरपालिका र दिक्तेल रुपाकोट मझुवागढी नगरपालिकाका विभिन्न स्थानमा देखिएको छ ।
शनिबार बिहान बुटवल आसपासबाट फैलिएको सलह किरा जिल्लामा पनि देखिन थालेपछि किसानमा त्रास फैलिएको छ । जिल्लाका विभिन्न ठाउँमा एकसाथ सलह देखिएपछि जिल्लास्थित स्थानीय तह तथा कृषि ज्ञान केन्द्र खोटाङको आपतकालीन बैठक बसेर नियन्त्रणको प्रयास थालिएको छ ।
प्रतिकृया दिनुहोस