चर्कियो न्यायीक आन्दोलन : सत्ता पक्षीय दलित नरम, प्रतिपक्ष गरम (भिडियोसहित)
प्रतिपक्षमा रहेका १४ दल निकट दलित संगठनहरुले प्रदर्शन गर्दा डेढ दर्जनलाई पक्राउ
काठमाडौं । पश्चिम रुकुम घटना लगायत देशभर दलित समुदायमाथि भइरहेका हत्या र अपमानका विरुद्ध देशभरका दलित समुदाय आन्दोलनमा छन् । खासगरी सोतीमा नवराज विकसहित ६ जना युवाहरु मारिएपछि देशभरका दलित समुदाय आन्दोलनमा छन् ।
देशभर आन्दोलन चर्किरहँदा राजधानीमा भने आन्दोलन दुई ध्रुवमा बाढिएका छन् । सत्ता पक्ष नेपाल कम्युनिष्ट पार्टी (नेकपा) को दलित संगठन र प्रतिपक्षमा रहेका १४ दलहरुका भात्रृ संगठनहरु आन्दोलनमा छन् ।
रुकुम पश्चिममा भएको वर्वर हत्याका विरुद्ध प्रतिपक्षमा रहेका १४ दल निकट दलित संगठनहरुले प्रधानमन्त्री निवास बालुवाटारमा प्रदर्शन गरे । प्रदर्शनका क्रममा प्रहरीले डेढ दर्जनलाई पक्राउ गरेको छ । तर, राजधानीमा पहिलोपटक सडक प्रदर्शन गरेको नेकपा निकटको दलित मुक्ति संगठनले भने शान्तिपूर्ण विरोध प्रदर्शन गरेको छ ।
उनीहरु रुकुमको सोतीमा भएको हत्याकाण्डको विरोध गर्दै प्रधानमन्त्री निवासमै ज्ञापन पत्र बुझाउन जाँदा भएको प्रदर्शनका क्रममा सांसद लक्ष्मी परियार, संविधानसभा सदस्य जीवन परियार, टेकबहादुर विक, राजकुमार हिंमाङ, रणबहादुर रम्तेल, राम नेपाली, सुनिता मरिक (डोम), दुर्गा बराइली, शर्मिला बागचन, शोभा सेन्चुरी, नानीमैया फुर्कोटी, धर्मराज विडवाल, संघर्ष दाहाल, हिक्मत महरा, लक्ष्मी थापा लगायत डेढ दर्जन अधिकारकर्मी पक्राउ परे । पक्राउ परेका सबैलाई साझ ५ बजेपछि भृकुटीमण्डपबाट रिहा गरेको छ ।
यता रुकुम पश्चिममा भएको वर्वर हत्या काण्डको विरोधमा पहिलोपटक सत्ता पक्षीय दलित संगठन सडकमा उत्रिएको छ । राजधानीको माइतीघरबाट पूदर्शन गर्दै उनीहरु नयाँ बानेश्वर पुगेर सभामा परिणत भएका थिए ।
प्रतिकृया दिनुहोस