नेप्से दोहोरो अंकले बढ्यो, ५४ करोड बढीको कारोबार

काठमाडौं । साताको दोस्रो दिन सोमबार सेयर बजारमा दोहोरो अंकले वृद्धि भएको छ ।

नेप्से परिसूचकमा १५.९८ अंकले वृद्धि भएको हो । १ हजार १ सय ९०.५५ अंकबाट शुरु भएको कारोबार दिउँसो २४ अंकले बढेर १ हजार २ सय १३ अंक भन्दा माथि पुगेको थियो ।

त्यसपछि केहीबेर ओरालो लागेको सेयर बजार कारोबार सकिने बेलामा १ हजार २ सय ६.२६ अंकमा पुगेको छ । यस अघि आइतबार नेप्से परिसूचक ८.८९ अंकले बढेको थियो । नेप्से परिसूचकसँगै सोमबार कारोबारमासमेत उल्लेख्य सुधार आएको छ । दिनभरमा भएका ५ हजार ९ सय ७१ कारोबारबाट १८ लाख ९८ हजार ३ सय ५ कित्ता सेयर किनबेच भएको थियो ।

जसअनुसार ५४ करोड ६० लाख २१ हजार ७ सय १९ रुपैयाँको कारोबार भएको छ । आइतबारको तुलनामा सोमबार २४ करोड रुपैयाँभन्दा बढी रकमको सेयर कारोबार भएको हो । आइतबार ३० करोड २५ लाख ९७ हजार २०१ रुपैयाँको कारोबार भएको थियो ।