कोरोना संक्रमणले भयावह बन्यो काठमाडौं, आज एकै दिन थपियो ३०१ जना

निशान न्युज Bhadra 10, 2077

काठमाडौं । पछिल्लो केही दिनयता काठमाडौं उपत्यका कोरोना संक्रमणको हटसपट बनेको छ । काठमाडौं उपत्यकामा पछिल्लो २४ घन्टामा अहिलेसम्मकै धेरै कोरोना संक्रमित फेला परेका छन् ।

पछिल्लो २४ घण्टामा काठमाडौं उपत्यकामा मात्रै ३०१ जनामा कोरोना भाइरस पुष्टि भएको छ ।

स्वास्थ्य तथा जनसंख्या मन्त्रालयका अनुसार काठमाडौं जिल्लामा मात्र २३० जना संक्रमित थपिएका छन् । यस्तै ललितपुरमा ४७ र भक्तपुरमा २४ जनामा संक्रमण पुष्टि भएको छ ।

संक्रमितको संख्या ३४ हजार नाघेको छ । पछिल्लो २४ घन्टामा ८ सय ८५ जनामा कोरोना संक्रमण भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका प्रवक्ता डा.जागेश्वर गौतमले देशका विभिन्न ठाउँमा थपिएका ८ सय ८५ जनासहित देशभर संक्रमितको संख्या ३४ हजार ४ सय १८ पुगेको जानकारी दिए ।