पक्राउ परिन् विद्यार्थी कुट्ने शिक्षिका पुन

रोल्पा । निर्मतापूर्वक विद्यार्थी कुट्ने शिक्षिका पक्राउ परेकी छन् । रोल्पाको रुम्टीगढी गाउँपालिका– ८ स्थित भानु आधारभूत विद्यालयकी शिक्षिका लक्ष्मी पुनले ढिलो आएको भन्दै १४ जना विद्यार्थीलाई कुटपिट गरेकी थिइन् ।

इलाका प्रहरी कार्यालय होलेरीबाट गएको प्रहरी टोलीले शिक्षिका पुनलाई सोमबार दिउँसो नियनत्रणमा लिएको हो । उनलाई पीडित पक्षले दिएको जाहेरीका आधारमा कारबाही पक्रिया अघि बढाइने प्रहरीले बताएको छ । शिक्षिकालाई इलाका प्रहरी कार्यालय होलेरीमा राखिएको छ ।

शिक्षिकाको कुटाईबाट पाँच जना विद्यार्थीको हात भाँचिएको थियो । सोहि दिन १० जना शिक्षक शिक्षिका मध्ये ४ जना मात्रै शिक्षिका विद्यालयमा आएका थिए । जेठ १२ गते निमित्त प्रधानाध्यापकको जिम्मेवारी सम्हालेकी पुनले निजी स्रोतमा कक्षा १ देखि ५ सम्म पढाउँदै आएकी छन् ।