भारतले पहिलो चरणमा तीन करोड मानिसलाई निःशुल्क खोप दिने

नयाँ दिल्ली । भारत सरकारले पहिलो चरणमा झण्डै तीन करोड आफ्ना नागरिकलाई कोरोना भाइरसविरुद्धको खोप निःशुल्क दिने भएको छ ।

भारतका स्वास्थ्यमन्त्री हर्ष बर्धनले नयाँदिल्लीमा खोप अभियानको पूर्वतयारीको अवलोकनका क्रममा पहिलो चरणमा स्वास्थ्यकर्मी तथा कोभिड महामारीमा फ्रन्टलाइनमा खटिएका लगायत तीन करोड मानिसलाई खोप लगाउने बताएका हुन् ।

भारत सरकारले यसअघि नै आउँदो जुलाई महिनाभित्र ३० करोडभन्दा बढीलाई खोप दिने घोषणा गरिसकेको छ । भारतले खोपको देशव्यापी वितरणका लागि विशेष अभियान नै तयार पारेको छ । भारत सरकारले खोप अभियानका लागि झण्डै एक लाख जनशक्तिलाई तयारी अवस्थामा राखेको जनाएको छ ।