मेलम्चीको मुहानमै बाढी पहिरो : ५० जनाभन्दा बढी वेपत्ता, लेदो र ठूला ढुंगासहितको पहिरो झर्ने क्रम जारी

काठमाडौं । सिन्धुपाल्चोकको मेलम्चीको मुहानमै बाढी पहिरो जाँदा आसपासका बस्ती बगाएको छ । मेलम्ची खानेपानीको मुहानभन्दा ९ किलोमिटर माथि हेलम्बु–१ स्थित नाकोटे भन्ने ठाउँमा पहिरो गएको छ ।

मंगलबार साँझ आएको बाढी र पहिरोले कम्तीमा चार जना बेपत्ता भएको प्रहरीले जनाएको छ । यद्यपि स्वास्थ्यमन्त्री शेरबहादुर तामाङले सामाजिक सञ्जालमा ५० जनाभन्दा बढी बेपत्ता भएको उल्लेख गरेका छन् । स्थानीयले पनि मंगलबार साँझ मेलम्ची (इन्द्रावती) मा आएको बाढीले धेरै हताहती भएको बताएका छन् ।

हेलम्बु बजार क्षेत्रका ३ पुरुष र १ महिला गरी चार जना बेपत्ता भएको पुष्टि भएको जिल्ला प्रहरी कार्यालय सिन्धुपाल्चोकका डिएसपी प्रकाश सापकोटाले जानकारी दिए ।

नाकोटे पूल, तिम्बु पूल, फट्टे पूल, मेलम्ची पूल, बाहुनेपाटी पूल, ढाँडखोला पूल समेत बाढीले बगाएको छ । दुईवटा पक्की पुल र ट्राउट माछा फार्म पनि बाढीले बगाएको छ । मेलम्ची–नवलपुर–चौतारा जोड्ने पुल समेत बगेको छ । ठाउँ–ठाउँमा झोलुङ्गे पुल पनि बगेका छन् । खानेपानी र विद्युत सेवा अवरुद्ध भएको छ ।

प्रहरीका अनुसार बाढी र पहिरो प्रभावित क्षेत्रमा यातायात सम्पर्क विच्छेद भएको छ । अहिले पनि लेदो र ठूला ढुंगासहितको पहिरो झर्ने क्रम जारी रहेकाले उद्धारमा कठिनाइ भइरहेको छ । उद्धारका लागि नेपाली सेना, सशस्त्र प्रहरी र नेपाल प्रहरीको टोली परिचालन भएको डिएसपी सापकोटाले जानकारी दिए ।

मेलम्ची खानेपानीको मुहान अम्बाथानतिरबाट बाढी उर्लिएर आएको र नदी किनारका बस्तीमा क्षति पुर्याएको स्थानीयले बताएका छन् । मेलम्ची आयोजनामा कार्यरत चिनियाँहरुको क्याम्प र आयोजनाको सुरक्षार्थ खटिएको सशस्त्र प्रहरीको क्याम्पमा पनि क्षति पुगेको स्थानीयको भनाइ छ ।

राति ठूलो बाढी र पहिरो झर्न थालेपछि किउल, ग्याल्थुम, तिपेनी, तालामाराङ, मेलम्चीलगायतका स्थानका बासिन्दा घर छाडेर सुरक्षित स्थानमा बसेका छन् ।