अन्तर्राष्ट्रिय उडानमा लागेको प्रतिवन्ध कात्तिक मसान्तसम्म लम्बियो, दसैं तिहारमा उपत्यकाको नाका सिल गर्न सुझाव

काठमाडौं । सरकारले कोरोना भाइरसको महामारीलाई थप बढ्न नदिनका लागि अन्तर्राष्ट्रिय उडान कात्तिक मसान्तसम्म प्रतिबन्ध लगाएको छ ।

सोमबार बसेको मन्त्रिपरिषद् बैठकले असोज मसान्तसम्म रोक लगाइएको अन्तर्राष्ट्रिय उडानलाई कात्तिक मसान्तसम्म लम्बाउने निर्णय गरेको हो । अहिले निश्चित क्षेत्रबाट भने उडान सञ्चालन भइरहेको छ ।

मन्त्रिपरिषद् बैठकले दसैँ बारेमा पनि नयाँ निर्णय गरेको छ । दसैँमा आवतजावत धेरै हुने भएकाले अहिले रहेकै ठाउँमा दसैँ मनाउने व्यवस्था गर्ने निर्णय बैठकले गरेको छ । त्यसका लागि के कसरी निर्णय कार्यान्वयन गराउने भन्ने विषय भने सम्बन्धित मन्त्रालयले जानकारी गराउने भएको छ ।

दसैँं–तिहारको समयमा उपत्यका प्रवेश गर्ने नाका बन्द गर्न सरकारलाई संसदीय उपसमितिले सुझाव दिइसकेको छ । प्रतिनिधि सभाको शिक्षा तथा स्वास्थ्य समिति अन्तर्गतको ‘कोभिड १९ नियन्त्रणमा सरकारको कामकारबाही अनुगमन उपसमिति’ ले उपत्यका प्रवेशको नाका सिल नगरे कोरोना भाइरसको महामारी थप भयावह हुने चेतावनी दिएको हो ।

गत भदौ ९ गते शिक्षा तथा स्वास्थ्य समितिको बैठकले श्रेष्ठको नेतृत्वमा सात सदस्यीय उपसमिति गठन गरेको थियो । उपसमितिले उपत्यका र उपत्यका बाहिरका विभिन्न जिल्लामा पुगेर कोरोना महामारी रोकथाममा सरकारले गरेको कामको अनुगमन गरी प्रतिवेदन तयार पारेको छ ।

संयोजक श्रेष्ठले उपत्यका बाहिर कोरोना महामारीबाट बच्न सतर्कता नअपनाइएको र अत्यधिक हेलचेक्र्याईं पाइएको छ । ‘उपत्यकाबाहिर कोभिडको प्रभाव नभएको जस्तो देखियो । कामकाज भइरहेकै छ । सरकारी कार्यालयमा भीड त्यत्तिकै लागेको छ । यो कदम गम्भीर विषय हो’ उपसमिति संयोजक जीवनराम श्रेष्ठले भने, ‘१० प्रतिशत मान्छेले मात्रै मास्क प्रयोग गरेको देख्यौं ।’