पर्साका कोरोना संक्रमितको गण्डक अस्पतालमा मृत्यु, मृतकको संख्या ४३ पुग्यो

काठमाडौँ । पर्साको वीरगञ्जमा एक जना कोरोना संक्रमितको उपचारका क्रममा मृत्यु भएको छ । गण्डक अस्पतालमा भर्ना भएका पर्सा माईस्थानका अन्दाजी ६० वर्षीय पुरुषको उपचारको क्रममा मंगलबार साँझ मृत्यु भएको अस्पतालले जनाएको छ । यससँगै नेपालमा कोरोना संक्रमणबाट ज्यान गुमाउनेको संख्या ४३ पुगेको छ ।

ती संक्रमितलाई गत सोमबार सास फेर्न गाह्रो भएपछि सुरुमा एडभान्स अस्पतालमा भर्ना गरिएको थियो । शंकास्पद विरामी भएको भन्दै उनलाई मंगलबार गण्डकस्थित कोभिड अस्पतालमा लगियो र उनको सोही दिन साँझ मृत्यु भयो । उनको मृत्यु भइसकेपछि पीसीआर परीक्षण रिपोर्ट पोजेटिभ आएको थियो ।